Ayollarni zoʻravonliklardan himoyalaymiz!

 "Adolat" SDP Qiziriq tuman “Ayollar qanoti” Kengashi va tuman Reabilitatsiya markazi hamkorlikda tumandagi Axborot kutubxona markazida “Ayollarni zoʻravonliklardan himoyalaymiz” mavzusida tadbir tashkil etildi. Tadbirda partiyaning tuman Kengashi va partiya tuman “Ayollar qanoti” Kengashi faollari, tuman Kengashi deputatlari, tuman Reabilitatsiya markazi faollari, boshlangʻich partiya tashkilot aʼzolari va tuman mahallalaridan xotin-qizlar ishtirok etishdi.Tadbirda soʻzga chiqqanlar mazkur tadbirni oʻtkazishdan maqsad gender zoʻravonlikning koʻrinishlari, yaʼni ruhiy, jismoniy va iqtisodiy zoʻravonlik boʻyicha bilim va koʻnikmalarni mustahkamlash, ayollarni oʻz haq-huquqlari boʻyicha yetarli bilimga ega boʻlishi zarurligi yuzasidan maʼruzalar qilishdi.

Aytish kerakki, ayollarga nisbatan zoʻravonliklar asosan sifatsiz taʼlim sabab boʻlgan past iqtisodiy koʻrsatkichli oilalar boshiga toʻgʻri keladi. Shu jumladan, ayollarga nisbatan zoʻravonliklar ayolning iqtisodiy yetishmovchiligi tufayli yuz beradi. Shuni aytish lozimki, dunyodagi davlatlarning kam qismi ayollarni tazyiq va zoʻravonlikdan himoya qilish borasidagi qonunlarni qabul qilgan.

Bu borada Oʻzbekiston “Ayollarni tazyiq va zoʻravonlikdan himoya qilish toʻgʻrisida”gi va “Ayollar va erkaklar uchun teng huquq va imkoniyatlar kafolatlari toʻgʻrisida”gi qonunlarni qabul qilgan sanoqli davlatlar qatoriga kiradi. Bu qonunlar davlat va boshqa tegishli tashkilotlarni ayollar zoʻravonligiga qarshi kurashish va ularga barham berishga chaqiradi.

Tadbir davomida ana shular xususida soʻz yuritilib, ayollarga nisbatan zoʻravonlik va reproduktiv yoshidagi ayollar oʻlimi va ularning mehnatga layoqatsiz boʻlib qolishining muhim sabablari koʻrsatib berildi.

Zuhra Tursunova, tuman tibbiyot birlashmasi xodimi, BPT aʼzosi:

Prezidentining 2019-yil 7-martdagi “Xotin-qizlarning mehnat huquqlari kafolatlarini yanada kuchaytirish va tadbirkorlik faoliyatini qoʻllab-quvvatlashga oid chora-tadbirlar toʻgʻrisida”gi qaroriga muvofiq, 2019-yil 2-sentyabrida qabul qilingan “Xotin-qizlarni tazyiq va zoʻravonlikdan himoya qilish toʻgʻrisida”gi Qonuni barchamizga maʼlumdir. Ushbu qonunlarni qabul qilinishi jamiyatda xotin-qizlarning huquqlari, erkinliklari hamda qonuniy manfaatlari tazyiq va zoʻravonlikdan himoya qilishni taʼminlash, jamiyatda huquqiy ong va huquqiy madaniyatni yuksaltirishga xizmat qiladi. Bu borada, fuqarolarning huquqlarini himoya qilish va qonuniylikni taʼminlashga advokatura, sud va huquqni muhofaza qilish organlari bir birlari bilan hamkorlikning yanada koʻpaytirib samarali xizmat qilishlari darkor. Xususan bunga misol, bugungi kunda jamiyatimizning qaysi jabhasiga qaramang xotin-qizlarimiz erkaklar bilan tengma-teng, yelkama yelka boʻlib faoliyat olib borayotganini koʻrishimiz mumkin. Bu esa, xotin-qizlarga nisbatan hurmat-ehtirom, millatimizga xos qadriyat, balki davlatimiz siyosatining ustuvor yoʻnalishiga aylanganligining yaqqol ifodasidir.

Tadbir soʻngida tadbir ishtirokchilari oʻzlarining qiziqtirgan savollariga tegishlicha javoblar olishdi.

      Zulayho Bozorova,

Oʻzbekiston “Adolat” SDP Qiziriq tuman “Ayollar qanoti” Kengashi faoli.