Barqaror rivojlanish yoʻlidagi qatʼiy intilish

      Kuni kecha Toshkent shahrida Prezidentimiz Shavkat Mirziyoyev raisligida “Hamkorlikda iqtisodiy barqarorlik va taraqqiyot sari” shiori ostida Iqtisodiy hamkorlik tashkilotining 16-sammiti boʻlib oʻtdi. Anjuman davomida sakkiz mamlakat yetakchilari hamda IHT bosh kotibi Xusrav Noziriy tomonidan IHT doirasida koʻp qirrali hamkorlik istiqbollari va uni yangi bosqichga olib chiqish masalalari muhokama qilindi, xalqaro va mintaqaviy ahamiyatga molik dolzarb masalalar yuzasidan atroflicha fikr almashildi.
     Davlatimiz rahbari sammitni ochar ekan, ushbu muhim tadbirdagi ishtiroki uchun oliy martabali mehmonlarga samimiy minnatdorchilik bildirdi, bu har tomonlama va oʻzaro manfaatli hamkorlikni kengaytirishga boʻlgan umumiy intilishlarning tasdigʻi ekanini taʼkidladi.
     Dolzarb mavzuda uyushtirilgan muloqotning eng muhim, oʻziga xos xususiyati - davlat rahbarlarining oldinda turgan vazifalarni birgalikda bajarish va mintaqadagi mavjud muammolarni bartaraf etish, oʻzaro savdoni ragʻbatlantirish, transport-kommunikatsiyaviy oʻzaro bogʻliqlikni kuchaytirish, sanoat kooperatsiyasini faollashtirish, energetika xavfsizligini taʼminlash, iqlim oʻzgarishiga qarshi kurashish, turizm va madaniy-gumanitar almashinuv sohasidagi hamkorlikni chuqurlashtirish kabi asosiy yoʻnalishlarga eʼtibor qaratilganida boʻldi.
     Qolaversa, Yurtboshimiz tomonidan oʻzaro investitsiyalar oqimini koʻpaytirish, ularni himoya qilish va sanoat kooperatsiyasini chuqurlashtirish boʻyicha Qoʻshma harakatlar dasturini ishlab chiqish hamda hududlararo sanoat koʻrgazmasini tashkil etib, uning dastlabki tadbirini 2024 yilda yurtimizda oʻtkazish muhimligi qayd etildi.
Shu bilan birgalikda sammit davomida Ozarbayjon, Eron, Qirgʻiziston, Tojikiston, Turkiya, Turkmaniston, Pokiston, Qozogʻiston delegatsiyalari rahbarlari hamda IHT bosh kotibi Xusrav Noziriy ham soʻzga chiqishdi.
     Tadbir yakunida Toshkent kommyunikesi qabul qilindi. Tashkilotga raislik Eronga oʻtdi, navbatdagi sammit Ozarbayjonda oʻtkazilishi belgilandi.
Mamlakatimizning xalqaro tashkilotlar va xorijiy davlatlar bilan oʻzaro manfaatli, teng aloqalar oʻrnatishi – xalqlar farovonligi, davlatlar rivoji uchun turtki boʻlmoqda.
Albatta, turli mintaqa davlatlari rahbarlari ishtirokida oʻtkazib kelinayotgan bunday uchrashuvlari natijasida davlatlarimiz va xalqlarimiz oʻrtasidagi doʻstlik va birodarlik rishtalarini va samimiy munosabatlarni yanada mustahkamlanishiga erishiladi va xalqlarimizning azaliy doʻstligi bardavom boʻladi, deb ishonamiz.

Orif SHUKUROV,
“Adolat” SDP Jizzax viloyat Kengashi raisi,
Xalq deputatlari Jizzax viloyat Kengashi deputati,