Bemor bolalarga quvonch ulashildi

Jahon sogʻliqni saqlash tashkilotining maʼlumotlariga koʻra dunyoda qandli diabet kasalligi tobora yosharib bormoqda. Hisob-kitoblarga qaraganda toʻrt yuz yigirma besh milliondan ortiq fuqarolar ushbu darddan aziyat chekmoqda ekan. Bemorlarning asosiy qismi xastalikning ikkinchi turi, yaʼni notoʻgʻri ovqatlanish va nosogʻlom turmush tarzi sabab vujudga kelmoqda.  Afsuski, viloyatimizda qandli diabetga chalingan oʻttiz mingga yaqin katta yoshdagi bemorlar orasida yosh bolalar ham bor. Viloyat boʻyicha ularning soni toʻrt yuz nafardan ziyodni tashkil etadi.
Xalqaro diabetga qarshi kurash kunida viloyat endokrinologiya markazi va “Adolat” SDP viloyat kengashi bilan hamkorlikda tadbir oʻtkazildi. Unda shifoxona bosh vrachi Bahriddin Siddiqov diabet kasalligining oldini olish va davolash chora-tadbirlari haqida atroflicha tushuncha berdi.
“Adolat” SDP viloyat kengashi raisi Isroiljon Joʻrayev partiya faollari nomidan bemorlar dardiga shifo tilagan holda, iroda va parhez orqali ushbu kasallikdan shifo topish mumkinligini eslatib oʻtdi. Shifoxonada davolanayotgan bir guruh bolalarga homiylar sovgʻalari ulashildi.

Tadbir nihoyasida bemorlar-ning qalbiga shodlik ulashish maqsadida sanʼatkorlar tomonidan kuy-qoʻshiqlar taqdim etildi.
Butunjahon qandli diabetga qarshi kurash kunlari 17-noyabrga qadar davom etadi.

"Adolat" SDP
 Namangan viloyat kengashi Matbuot xizmati.