“Bir adolatchi — yuz ayolga himoyachi” loyihasi

Oʻzbekiston “Adolat” sotsial-demokratik partiyasining “Bir adolatchi yuz ayolga himoyachi” loyihasi doirasida xotin-qizlarni ijtimoiy-huquqiy jihatdan qoʻllab-quvvatlash, ularning oila va jamiyatdagi mavqeyini mustahkamlashga qaratilgan keng koʻlamli ishlar amalga oshirilmoqda.

Bu boradagi saʼy-harakatlar partiyaning Shoʻrchi tumani Kengashi tomonidan ham tizimli yoʻlga qoʻyilgan.

Tumandagi “Xayrobod” mahallasida xalq deputatlari Shoʻrchi tumani Kengashi deputati Oʻrol Sherxonov tomonidan partiyaning “Ayollar qanoti” kengashi faollari hamda tuman Hokimligi bilan birgalikda xotin-qizlarning muammolarini oʻrganishga qaratilgan sayyor qabul tashkil qilindi. Unda ushbu hududda istiqomat qilayotgan “Ayollar daftari” roʻyxatidagi bir guruh xotin-qizlar bilan suhbat olib borildi. Muammolari oʻrganildi. Ochiq muloqot jarayonida xotin-qizlar tomonidan kelib tushgan oʻnga yaqin murojaat boʻyicha huquqiy va psixologik maslahat berildi.

Nilufar Nazarova, partiyaning Shoʻrchi tuman “Ayollar qanoti” Kengashi faoli:

– Loyiha doirasida xotin-qizlarning huquqiy manfaatlarini har tomonlama himoya qilish, ish bilan taʼminlash, mehnat va oʻqish sharoitlarini yaxshilashga alohida eʼtibor qaratilmoqda.

Ayniqsa, ularni tadbirkorlik faoliyatiga keng jalb etishga qaratilgan ishlar oʻzining ijobiy samarasini bermoqda.

Uchrashuvda deputatimiz tuman Hokimligi masʼullari bilan hamkorlikda murojaat qilgan xotin-qizlardan 10 nafarining ish bilan bandligi taʼminlanishida amaliy yordam berdi, tadbirkorlik qilish istagini bildirgan yana 5 nafar ayolga imtiyozli kreditlar ajratilishida koʻmaklashdi. Shuningdek, 15 nafar xotin-qizning esa kasb-hunarga oʻqitilishi rejalashtirildi, 10 tasiga takroriy ekin joylaridan yer ajratilib, bandligi taʼminlanishi aytib oʻtildi.

Nogironligi boʻlgan va oʻzgalar parvarishiga muhtoj xotin-qizlarga davolanishi uchun tuman hokimligi bilan hamkorlikda moddiy yordam toʻlab berilishi belgilandi.Yana besh nafar ayolga kundalik ehtiyojga kerakli oziq-ovqat mahsulotlari tarqatildi

Dilafroʻz Rahmatova,
Oʻzbekiston “Adolat” SDP
Surxondaryo viloyat Kengashi
bosh mutaxassisi