Biz oilaviy ajrimlarga qarshimiz!

Oltinsoy tuman “Ayollar qanoti” Kengashi, tuman Xotin-qizlar boʻlimi hamda Maʼnaviyat va maʼrifat markazi Oltinsoy tuman boʻlinmasi hamkorligida tumandagi “Ipoq” mahallasida joylashgan 44-sonli umumtaʼlim maktabida mahallaning faol fuqarolari va yoshlar ishtirokida “Biz oilaviy ajrimlarga qarshimiz” shiori ostida “Oilaviy munosabatlarni mustahkamlash” mavzusida davra suhbati tashkil etildi.

Tadbirda soʻzga chiqqanlar yurtimizda oilaviy munosabatlarni mustahkamlash, ajrimlarning oldini olish, oiladagi tinchlik va totuvlikni, oʻzaro hurmat, mehr-muruvvat va hamjihatlik fazilatlarini shakllantirish, asosan yosh oilalar oʻrtasida qaynona-kelin, qaynona-kuyov bola, qaynona-qaynota, er-xotin, oʻgʻil-qizlarning oiladagi oʻrni, ularning vazifalari haqida tushunchalar berilib, ular oʻrtasida mustahkam munosabatlarni yoʻlga qoʻyish hamda oilalardagi ajrimlarning oldini olish boʻyicha tushuntirildi.

Malika Xidirova, partiya tuman “Ayollar qanoti” Kengashi faoli:

- Tumanimizda hamkor tashkilotlar bilan birgalikda “Biz oilaviy ajrimlarga qarshimiz” shiori ostida joylarda targʻibot ishlarini olib boryapmiz. Targʻibot ishlari davomida tuman boʻyicha fuqarolar sudiga borgan jami 17 ta yosh oilalardan 5 tasini ajrimlarining oldi olinib, oilalarning yarashishiga erishildi.Har bir oila aʼzolari birma-bir tinglanib, tushuntirish ishlari olib borildi. Oʻtkazilgan tushuntirish va targʻibot natijasida oilalar yarashtirilib, qolganlari esa qayta oʻylab murosaga kelishlari uchun muddat berilib, nazoratga olindi.

Bundan tashqari, tumanda hamkorlar tomonidan tuman mahallalarida “Qaynonalar kengashi” chora-tadbiri asosida qaynonalar oʻrtasida “Eng namunali qaynona”, “Eng namunali kelin” koʻrik tanlovlari oʻtkazilib, tanlovlarda qaynonalar, kelinlar tomonidan oila aʼzolarining tinchligini saqlash, oilaning doimiy iqtisodiy daromadi manbalaridan foydalanish jarayonida uy oldi yer maydoni uchastkalaridan hamda kasanachilik, tikuvchilik boʻyicha bandligini taʼminlash boʻyicha hamda oʻzlarining hayot tajribalari bilan yutuqlarini yoshlarga targʻibot qilish faoliyatida faol qaynonalar, kelinlar aniqlanib, ularning ishlari namuna qilinmoqda.

Gulshod Tursoatova,

Oʻzbekiston “Adolat” SDP

Surxondaryo viloyat Kengashi matbuot kotibi.