Biz tinchliksevar adolatli va progressiv tashqi siyosat tarafdorimiz

Konstitutsiyada Oʻzbekiston Respublikasi barcha xorijiy davlatlar va tashkilotlar bilan koʻp tomonlama munosabatlarni har tomonlama rivojlantirishga qaratilgan tashqi siyosatni amalga oshirishi belgilandi. Shundan kelib chiqqan holda Oʻzbekistonning uzoq va yaqin xorijiy mamlakatlar bilan ikki tomonlama manfaatli aloqalarini mustahkamlash va xalqaro tashkilotlar faoliyatida ishtirokini yanada kengaytirish zarur.

Bugun Oʻzbekiston Respublikasi Prezidentligiga nomzod Robaxon Mahmudovaning Qashqadaryo viloyatidagi ishonchli vakili Ruiddin Raupovning Yakkabogʻ tumani musiqa va sanʼat maktabi tadbirgohida saylovchilar bilan uchrashuvida ham shular xususida soʻz yuritildi.

-Nomzod saylovoldi dasturida mustaqil Oʻzbekiston Markaziy Osiyo davlatlari bilan taqdiri chambarchas bogʻliqligi alohida eʼtirof etilgan,-dedi Ruiddin Raupov. Biz mamlakatimizning tub milliy manfaatlaridan kelib chiqqan holda barcha davlatlar bilan oʻzaro manfaatli aloqalarni yanada rivojlantirishni oʻz oldimizga maqsad qilganmiz.

Shuningdek, uchrashuvda Ruiddin Raupov BMTning barqaror rivojlanish dasturi doirasida ijtimoiy va gumanitar loyihalarni amalga oshirishda oʻzaro manfaatli xalqaro hamkorlikni mustahkamlash, jahon savdo tashkilotiga aʼzoligini jadallashtirish va ushbu savdo tashkilotiga aʼzo mamlakatlar bilan barqaror savdo aloqalarini rivojlantirish oʻrnatish imkoniyatlari kengaytiriladi.

Uchrashuvda Ruiddin Raupov nomzod dasturidagi tibbiyot, taʼlim, fuqarolik jamiyatini yanada rivojlantirish, atrofimizdagi yashil olamni himoya qilish, xotin qizlar va yoshlarning siyosiy faolligini oshirish, bandligini taʼminlash, ijtimoiy adolatli jamiyat barpo etish borasidagi yoʻnalishlar xususida ham ishtirokchilarga keng tushuntirish berdi.

Fuqarolar koʻproq bandlik, sogʻliqni saqlash, huquqiy yoʻnalishdagi savollar bilan murojaat qildilar. Ruiddin Raupov ishtirokchilarning barcha savollariga nomzod dasturidan kelib chiqqan holda batafsil javob qaytardi.

    Ural Umarov, partiya faoli.