Bolalar huquqlari milliy qonunchiligimiz himoyasida

Bolalarga mehr hamda eʼtibor koʻrsatish, gʻamxoʻrlik qilish oʻzbek xalqiga xos boʻlgan ijobiy fazilatlardan biridir. Soʻngi yillarida Yurtboshimiz boshchiligida mazkur masalaga jiddiy eʼtibor qaratilib, bolalar haq-huquqini himoyalashga doir qator qonun va meʼyoriy hujjatlar qabul qilindi, shular asosida tub islohotlar amalga oshirildi.

Yaqinda “Bolalarni zoʻravonlikning barcha shakllaridan himoya qilish toʻgʻrisida”gi qonun loyihasi ham ishlab chiqilib, jamoatchilik muhokamasi uchun portalga joylandi. Mazkur qonun loyihasi boʻyicha fuqarolarimiz oʻzlarining ijobiy fikr-mulohazalarini bildirishdi.

Bugun “Adolat” sotsial-demokratik partiyasi Jizzax viloyat Kengashi tomonidan bolalarga tazyiq va zoʻravonlik oʻtkazishning oldini olishga qaratilgan ushbu qonun loyihasiga bagʻishlangan targʻibot tadbiri tashkil etildi.

Tadbirda partiya viloyat Kengashi xodimlari, mahalliy deputatlar, texnikum oʻqituvchi va talabalari, va OAV vakillaridan ishtirok etishdi.

Tadbirda oʻzbek xalqi qadim tarixdan bolani eʼzozlab kelganligi, mamlakatimizda uning huquqlarini himoya qilishning huquqiy asoslari yaratilganligi hamda Oʻzbekiston Respublikasining Konstitutsiyasi va qator qonunlarda bola huquqlariga alohida oʻrin berilganligi taʼkidlandi.

Taʼkidlanganidek, kelajagimiz vorisi boʻlgan bolalarning Bosh qomusimiz va amaldagi qonunlarimizda belgilangan huquq va erkinliklarining hayotdagi ifodasi, yoshlarning jamiyatimizda munosib oʻrin egallashi ularning huquqiy madaniyatini yuksaltirish bilan uzviy bogʻliq boʻlgan jarayondir. Bu borada alohida Qonunning qabul qilinishi yangi bir mexanizmni vujudga keltirishi shubhasiz.

Qolaversa, tadbirda soʻzga chiqqanlar tomonidan mazkur qonun loyihasi bolalarning ijtimoiy huquqlarini yanada kafolatlashi bilan bir qatorda, bolalarning huquqiy tarbiyasini yaxshilashi, shu sohaga oid qonunchilikni yanada rivojlantirishi, ularni zoʻravonlikdan himoya qilish faoliyatini bevosita amalga oshiruvchi davlat organlari va tashkilotlariga yanada koʻproq masʼuliyat yuklashi borasida fikr-mulohazalarini bildirib oʻtishdi.

Tadbir soʻngida ishtirokchilar tomonidan berilgan savollarga masʼullar atroflicha javoblar berishdi.

“Adolat” SDP Jizzax viloyat Kengashi

Matbuot xizmati.