BOLALARNI ZOʻRAVONLIKLARNING BARCHA SHAKLLARIDAN HIMOYA QILAMIZ!

Bugungi kunda ayrim xorijiy davlatlarda boʻlayotgan oʻzaro nizolar va urushlar tufayli begunoh bolalar aziyat chekmoqda va hatto qurbon boʻlmoqda. Bundan tashqari bagʻritosh, yovuz va axloqsiz kimsalar tomonidan  bolalarga nisbatan zoʻravonliklar qilinayotganligi har qanday kishining dilini ogʻritib, iztirobga solmoqda.                         

“Adolat” sotsial-demokratik partiyasining saylovoldi dasturida adolatli jamiyat qurish, jumladan, bolalar huquqlarini himoya qilish, ularga nisbatan qilinadigan zoʻravonliklarning har qanday turidan asrash, himoya qilish va shuningdek, bolalarning taʼlim-tarbiya olishi, sport bilan shugʻullanishi, kasb-hunar egallashi uchun barcha sharoitlarni yaratish gʻoyalari ilgari surilgan.
Koʻzda tutilgan maqsadlarni amalga oshirish, qonun bilan himoyalash maqsadida Oʻzbekiston “Adolat” sotsial-demokratik partiyasi tomonidan Oʻzbekiston Respublikasining “Bolalarni zoʻravonliklarning barcha shakllaridan himoya qilish toʻgʻrisida”gi qonun loyihasi boʻyicha qator targʻibot ishlari olib borilmoqda.
Jumladan bugun Uychi tumanidagi ikkinchi sonli kasb-hunar maktabining majlislar xonasida oʻtkazilgan tadbirda ham mazkur qonun loyihasi keng muhokama qilindi.
Tadbirni “Adolat” sotsial-demokratik partiyasining Namangan viloyat kengashi raisi Isroiljon Joʻrayev olib bordi.
Muhokama etilayotgan mazkur qonun loyihasi boʻyicha viloyat kengashi raisi oʻrinbosari Bahodir Boltaboyevning hamda viloyat ichki ishlar boshqarmasining voyaga yetmaganlar va yoshlar bilan ishlashni tashkil etish boʻlinmasi boshligʻi Ulugʻbek Sharipovning maʼruzalari tinglandi. Maʼruzachilar qonun loyihasi haqida atroflicha toʻxtalib oʻtib, amaldagi qonunchilikka koʻra, bolaning hayoti yoki sogʻligʻiga xavf tugʻilgani, uning huquqlari, erkinliklari va qonuniy manfaatlari buzilganligidan xabardor boʻlgan shaxslar bolalarni birinchi navbatda zoʻravonlikdan himoya qilishi, agar buning imkoni boʻlmasa, zudlik bilan vakolatli organlarga murojaat qilishi lozimligini eslatib oʻtishdi. Bolalarga nisbatan qilinayotgan zoʻravonlik — kelajakka qilingan zoʻravonlik, deya taʼkidlashdi maʼruzachilar. Shuningdek, beparvolik yoki befarqlik ham bolalarga nisbatan zoʻravonlik hisoblanadi. Muhokama qoʻyilgan mazkur qonun loyihasida bu boradagi xatti-harakatlar tartibga solinmoqda, qonuniy jihatdan baholanishi koʻzda tutilmoqda. Bu eng avvalo, jamoatchilik eʼtiborini, masʼuliyatni yanada oshirishga, bolalarning qonuniy himoyasini kuchaytirishga xizmat qilishini taʼminlaydi.

Maʼruza yuzasidan boʻlib oʻtgan muzokaralarda xalq deputatlari Uychi tuman Kengashi deputati Rahmonberdi Ismoilov, “Yangi chek” mahalla fuqarolar yigʻini faoli Sohiba Toʻychiyeva, kasb-hunar maktabi oʻquvchisi Shohjahon Olimov soʻzga chiqib, bolalarning asosiy ehtiyojlari va eng ustun manfaatlariga zid boʻlgan, uning hayoti, sogʻligi, jinsiy daxlsizligi, shaʼni, qadr-qimmati va qonun bilan himoya qilingan boshqa huquqlari hamda erkinliklariga tajovuz qiladigan, shu jumladan jismoniy yoki ruhiy azob beradigan har qanday harakat qonun bilan himoya qilinishiga yaxshi baho berishdi.  Tadbirda mazkur qonun boʻyicha bir qator taklif va mulohazalar bildirildi.

Joylarda partiya faollari tomonidan “Bolalarni zoʻravonliklarning barcha shakllaridan himoya qilish toʻgʻrisida”gi qonun loyihasini targʻib qilish va takliflar bildirish jarayoni davom etmoqda.
                                                                                                                                              "Adolat" SDP
                                                                                                                                  Namangan viloyat kengashi
                                                                                                                                  Matbuot xizmati.