Chortoqlik oʻqituvchi tanlovda “SPARK” avtomobilini qo'lga kiritdi

Kitob-oftob xalqimizda ana shunday ajoyib naql bor. U chindan ham bilimlar xazinasi, moʻjizakor kuchga ega. Mutolaa bilan shugʻullanish insoni barkamol shaxsga aylanishiga imkoniyat beradi.

Shuning uchun ham mamlakatimizda aholi oʻrtasida kitobxonlik keng yoʻlga qoʻyishga alohida eʼtibor qaratilmoqda. Davlatimiz rahbari tashabbusi bilan muntazam oʻtkazilayotgan turli-tuman koʻrik tanlovlar shular jumlasidandir. Ularni oʻtkazishda partiyamiz faollari ham qatnashmoqdalar.

- Ayniqsa, “Yosh kitobxon” tanlovining ommaviyligi tobora oshib bormoqda, — deydi “Adolat” SDP Chortoq tuman kengashi raisi Habibaxon Mirabdullayeva. — Bu-bilimdondar bazasining koʻrik bosqichlarini muvaffaqiyatli oʻtkazishga partiyadoshlarimiz ham munosib hissa qoʻshishdi. Vakillarimizning koʻp qismi qatnashchilar safida, boshqalari esa hayʼat aʼzolari tarkibida boʻlishdi.

- H. Mirabdullayevaning aytishicha, u Peshqoʻrgʻon qishlogʻidagi 22-umumtaʼlim maktabida tashkil etilgan “Yosh kitobxon”ning boshlangʻich bosqichida ishtirok etgan. Oʻshanda u mazkur maktab oʻqituvchisi Zamira Abdullayevaning bilimi va qobiliyatiga tan bergandi. Koʻpchilik qatori uni muvaffaqiyat bilan qutlab Respublika bosqichida gʻolib boʻlishiga tilak bildirgandi. Buni qaranki oradan maʼlum vaqt oʻtgach ushbu niyat amalga oshib turibdi-da.

Oʻtgan haftada Toshkentda “Yosh kitobxon” koʻrik tanlovining yakuniy bosqichi boʻldi. Chortoqlik Zamira Abdullayeva Namangan viloyat sharafini himoya qildi. U barcha shartlarni aʼlo darajada bajarib, 20-30 yoshlik ishtirokchilar oʻrtasida oliy oʻrinni egalladi. Z. Abdullayeva “Spark” yengil avtomobili mukofoti topshirildi.

Kuni kecha koʻrik tanlov gʻolibi oʻzi ishlaydigan maktabda tantanali kutib olindi. Bayramga aylanib ketgan marosimda keng jamoatchilik vakillari ishtirok etdilar. “Yosh kitobxon” koʻrik tanlovini gʻolibi shaʼniga iliq soʻzlar aytildi. Zamira Abdullayeva ham oʻzining dil soʻzlarini izhor etdi.

- Respublika tanlovida maktabimiz sharafini munosib himoya qilganimdan baxtiyorman, — deydi u. Bunda ustozlarimning beqiyos hissasi bor. Bundan keyin ham bolalarga oʻzbek tili va adabiyotidan chuqur bilim berishga, ularda kitobga mehr uygʻotishga astoydil harakat qilaveraman.

Nurbek Abdullaev,

“Adolat” SDP Namangan viloyat

Kengashi matbuot kotibi.