Davlat dasturi diqqat markazida

Oʻttiz ikki yildirki, mamlakatimiz mustaqil rivojlanish yoʻlidan buyuk kelajak sari dadil odimlamoqda. Ayniqsa, keyingi yillarda taraqqiyotni strategiyasi asosida amalga oshirilgan ulugʻvor ishlar eʼtiborga loyiq. Ijtimoiy-iqtisodiy sohalarni biron jabhasi yoʻqki, unga islohotlar nafasi kirib bormagan boʻlsa. Shu tufayli xalqimiz hayoti tobora farovonlashib odamlarning ertangi kunga ishonchi ortib bormoqda.

Ayniqsa, Yangi Oʻzbekistoning Taraqqiyot strategiyasini amalga oshirishga oid davlat dasturlarini hayotga tatbiq etish yaxshi samara bermoqda. Aniq belgilangan vazifalarni roʻyobga chiqarish orqali iqtisodiy va ijtimoiy tarmoqlarda katta oʻsishga erishilmoqda. Kuni kecha viloyat kengashida oʻtkazilgan yigʻilishda ana shu haqida fikr yuritildi. Unda partiya faollari, deputatlari, “Ayollar qanoti” va “Yosh adolatchi”lar qanoti aʼzolari ishtirok etdilar.

Partiya viloyat kengashining raisi Isroiljon Joʻrayev soʻzga chiqib, yaqinda matbuotda eʼlon qilingan “2022-2026 yillarga moʻljallangan yangi Oʻzbekistoning Taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida”gi Prezident farmoni haqida axborot berdi. Koʻpchilikning taklifiga binoan bu muhim hujjatning mazmun-mohiyatini aholiga keng tushuntirish, uni roʻyobga chiqarishga munosib hissa qoʻshish yuzasidan tadbirlar rejasi ishlab chiqildi. Buning uchun joylarda davra suhbatlari, uchrashuvlar, maʼruzalar tashkil etiladi.

Maʼlumki, ushbu dasturga muvofiq 2023/2024 oʻquv yilidan boshlab respublikaning barcha viloyatlari va Toshkent shahrida boshlangʻich sinf oʻquvchilarini bepul ovqat bilan taʼminlash yoʻlga qoʻyiladi. 2023-yil 1-apreldan boshlab respublikaning barcha aholi punktlarida transport vositalari harakatlanishining eng yuqori tezligi soatiga 70 kilometrdan 60 kilometrgacha tushiriladi.

Shuningdek, Tadbirkorlik subyektlarining huquqiy himoyasini yanada kuchaytirish maqsadida 2023-yil 1-iyuldan boshlab tadbirkorlik subyektlariga nisbatan yangi turdagi javobgarlik va jazo choralarini joriy etishga uch yillik moratoriy oʻrnatiladi. 32 ming nafar fuqaroga bozor tamoyillariga asoslangan ipoteka kreditlari, shuningdek 11 ming nafar fuqaroga boshlangʻich badal va foiz toʻlovlarining bir qismini qoplashga subsidiyalar ajratish uchun Davlat byudjetidan yetarli mablagʻlar yoʻnaltiriladi. 2023-yilda jamoatchilik fikri asosida shakllantiriladigan loyihalarni moliyalashtirish uchun Davlat byudjetidan 8 trln soʻm, shundan “Obod qishloq” va “Obod mahalla” dasturlari uchun 4 trln soʻm yoʻnaltiriladi va boshqalar.

Oʻylaymizki, partiyadoshlarimizning bu ulugʻvor ishlarga kamarbastaligi yurtimizning yanada obod, xalqimiz turmushining bundan ham farovon boʻlishiga xizmat qiladi. Ayni kunlarda shahar va tumanlarda targʻibot ishlari keng avj oldirilmoqda.

Bahodir Boltayev,

“Adolat” SDP Namangan viloyat

Kengashi raisining oʻrinbosari.