Davlat dasturidagi islohotlar xalq farovonligiga hizmat qiladi

Barchamizga maʼlumki, Oʻzbekiston Respublikasi Prezidentining 2023-yil 28-fevraldagi PF-27 Farmoni bilan 2022-2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi tasdiqlandi.

Davlat dasturida iqtisodiyot tarmoqlarida barqaror yuqori oʻsish surʼatlarini taʼminlash orqali kelgusi besh yilda aholi jon boshiga yalpi ichki mahsulotni — 1,6 barobar (1750 dollardan 2800 dollarga) va 2030-yilga borib aholi jon boshiga toʻgʻri keladigan daromadni 4 ming AQSH dollaridan oshirish hamda “daromadi oʻrtachadan yuqori boʻlgan davlatlar” qatoriga kirishini eʼtirof etilganligi milliy iqtisodiyotimizni jadal rivojlanishiga xizmat qiladi.

Davlat dasturida milliy iqtisodiyotni jadal rivojlantirish va yuqori oʻsish surʼatlarini taʼminlash boʻyicha ichki va tashqi bozorlarda talab yuqori boʻlgan yangi turdagi, respublikada ishlab chiqarilmaydigan mahsulotlarni mahalliylashtirish alohida belgilangan.

Jumladan, hududlarning salohiyati, geografik joylashuvi hamda tabiiy va mineral resurslarini hisobga olgan holda yangi turdagi yuqori texnologik, zamonaviy, energiya tejamkor, innovatsiya va fan yutuqlariga asoslangan mahsulotlar ishlab chiqarishni oʻzlashtirish dasturini ishlab chiqish hamda mahalliylashtirish dasturi doirasida kamida 60 trln soʻmlik mahsulotlar ishlab chiqarishga erishiladi.

Shuningdek, Davlat dasturida mahalliy ishlab chiqarish korxonalari oʻrtasida tarmoqlararo sanoat kooperatsiyasi aloqalarini yanada kengaytirish alohida belgilab qoʻyilgan.

Shu asosida, hududiy tarmoqlararo sanoat yarmarkalarini va respublika sanoat yarmarkasini yuqori darajada oʻtkazish.Bunda, hududiy va respublika tarmoqlararo sanoat yarmarkalarida tarmoqlar va yirik sanoat korxonalari tomonidan asosiy faoliyat turi boʻyicha kooperatsiya asosida oʻzlashtirish tavsiya etiladigan tovarlar namunalarini namoyish etish va yirik sanoat korxonalari tomonidan sanoat kooperatsiyasiga qiziqish bildirgan xususiy korxonalarni “shatakka olish”, yirik investitsiya loyihalarini amalga oshirish uchun zarur boʻlgan qurilish materiallari, metallokonstruksiya va uskunalar, elektrotexnika mahsulotlari, tez ishdan chiquvchi va doimiy foydalaniladigan butlovchi qismlarni oʻzlashtirish hamda sotib olish boʻyicha mahalliy korxonalar bilan hamkorlik shartnomalari imzolanadi.

Bundan tashqari, 2023-yil 1-sentyabrdan boshlab aholi va tadbirkorlik subyektlariga subsidiya ajratish bilan bogʻlik, barcha xizmatlar bosqichma-bosqich “Aholi va tadbirkorlik subyektlariga subsidiya ajratishning yagona elektron platforma”siga oʻtkazilishi hamda subsidiyalarni ajratishning maqsadga muvofiqligini elektron platforma orqali onlayn tekshirish tizimi yoʻlga qoʻyilishi bunda, subsidiyalar ajratish toʻgʻrisidagi arizalarni yagona interaktiv davlat xizmatlari portali orqali yoki istalgan tuman (shahar) davlat xizmatlari markazlari orqali topshirish imkoniyatini yaratish hamda ortiqcha byurokratik toʻsiqlar va boshqa korrupsiyaviy omillarni bartaraf etishga xizmat qiladi.

Eng asosiysi, tadbirkorlik subyektlarining huquqiy himoyasini yanada kuchaytirish maqsadida 2023-yil 1-iyuldan boshlab tadbirkorlik subyektlariga nisbatan yangi turdagi javobgarlik va jazo choralarini joriy etishga uch yillik moratoriy oʻrnatish joriy etilishi tadbirkorlarni erkin faoliyat yuritishiga imkon yaratadi.

Xulosa shuki, “Insonga eʼtibor va sifatli taʼlim yili”davlat dasturida milliy iqtisodiyotni jadal rivojlantirish, iqtisodiyot tarmoqlarida barqaror yuqori oʻsish surʼatlarini taʼminlash hamda eng asosiysi tadbirkorlik subyektlarining huquqiy himoyasini boʻyicha uch yillik moratoriy oʻrnatish joriy etilayotganligi islohotlarimiz insonga eʼtibor va xalq farovonligiga xizmat qilayotganligidan dalolat beradi.

Madiya Sabitova,

Xalq deputatlari Navoiy viloyat Kengashidagi

Oʻzbekiston “Adolat” SDP deputatlik guruhi aʼzosi,

viloyat Kengashi deputati.