Deputat koʻmagi bilan mahalla aholisi ichimlik suvi bilan taʼminlandi

Keyingi yillarda viloyatimizda, xususan, Denov tumanida ham aholini toza ichimlik suvi bilan taʼminlash, odamlarning turmush farovonligini oshirish borasida keng koʻlamli ishlar olib borilmoqda.

Bu borada Surxondaryo viloyat, tuman va shahar Kengashlari deputatlari ham zimmalariga yuklatilgan vazifalarni faollik bilan amalga oshirmoqdalar. Jumladan, koʻp yillardan buyon ichimlik suv taʼminotidagi muammolar, maʼnan eskirgan quvurlardagi avariyalar tufayli aziyat chekib kelayotgan mahallalarga ham toza ichimlik suvi yetib bormoqda.

Xususan, Xalq deputatlari Denov tuman Kengashi deputati Islom Xudoyberdiyev tomonidan ham bir qator ijobiy ishlar amalga oshirilmoqda.Deputat partiyaning “Muammo bilan yuzma-yuz” loyihasi doirasida tumandagi “Yangiobod” mahallasi aholisi bilan uchrashganda mahallada ichimlik suvi bilan bogʻliq muammolar borligi, mahalla ahli, nuroniy va yoshlar bilan oʻtkazilgan muloqotlar jarayonida aholi tomonidan shu xususda koʻplab murojaatlar tegishli tashkilotlarga yoʻllanganligi, ammo ijobiy javob boʻlmaganligini aytishdi. Deputatga mahallada yashovchi fuqarolar oqava suv quduq quvurlari koʻp yillardan buyon nosoz holatda turganligini, yangilab ichimlik suvi keltirish zarurligini, bu borada amaliy yordam berishlarini soʻrab murojaat etdilar.

Deputat mazkur muammoni atroflicha oʻrganib chiqdi va amaliy ishga kirishdi. Mazkur mahalladagi koʻp yillardan buyon nosoz holatda turgan toza ichimlik suvi qudugʻini oʻz homiylik yoʻli bilan soz holatga keltirib mahalla aholisiga ichimlik suvi chiqarib berdi

Shuningdek, mahalla hududida boshqa mahallalar hududiga olib boruvchi yoʻl taʼmirtalab boʻlib qolgan, asfalt qismi yemirilgan va yoʻlning ostki qismidan oʻtgan ichimlik suvi quvurlari eskirib, yorilib ketgan edi. Deputat mahalla fuqarolari yuzma-yuz muloqotlarda mazkur yoʻlni taʼmirlash va yer osti quvurlarini yangisiga almashtirib berishda ham amaliy yordam koʻrsatdi.

-Mahallamizdagi aholi koʻp yillarki, ichimlik suvi tanqisligidan aziyat chekishardi, — deydi mahalla fuqarolaridan Lola Xidirova.. — Ular tuman kengashi deputati Islom Xudoyberdiyevga murojaat qilishgach, uning tashabbusi bilan bu muammo ijobiy hal qilindi. Deputat yordami bilan 0,5 kilometr masofaga 15 million soʻmlik suv quvuri tortildi. Bu xayrli ish natijasida 50 ta xonadonga ichimlik suvi kirib boradigan boʻldi.

-Tumanda 9 ta mahalla uchun ichimlik suvi tarmoqlari tortilishini rejalashtirilganmiz. Avvalroq, tumanimizdagi mahallalardan toʻrttasiga yangi suv minorasi oʻrnatildi. Natijada 2 ming 18 ta xonadonda yashovchi aholining ichimlik suvi bilan bogʻliq barcha muammolari hal boʻldi,-deydi deputat Islom Xudoyberdiyev.

Bundan tashqari, deputat shu kunlarda koʻmakka muhtoj oilalarga oziq-ovqat, qishloq xoʻjalik mahsulotlarini ham tarqatilishida faollik koʻrsatmoqda.

Gulshod Tursoatova,

 “Adolat” SDP Surxondaryo viloyat Kengashi matbuot kotibi