Deputat mahallada-muammolar yechimi sari

Partiyaning “Muammo bilan yuzma yuz” loyihasi doirasida boʻlib oʻtayotgan tadbirlar, muloqotlar davomida mahalliy Kengash deputatlari aholi tomonidan koʻtarilgan muammolar yechimiga alohida eʼtibor qaratish bilan bir qatorda obodonlashtirish, bunyodkorlik jarayonlarida ham faol ishtirok etmoqdalar. Xususan, Xalq deputatlari Shoʻrchi tuman kengashi deputati Oʻrol Sherxonov Shoʻrchi tumanidagi qator mahallalarda boʻlib, odamlarni qiynayotgan muammolarni oʻrganmoqda.Ularni bartaraf etish yuzasidan aholi vakillari bilan uchrashib, suhbatlar oʻtkazdi. Fuqarolarning qiziqish va takliflari bilan tanishib, muammolarning hal etish choralarini koʻrmoqda. Jumladan, tumandagi “Ibn Sino” mahallasida boʻlib, aholi vakillari bilan oʻtkazgan uchrashuvida qator muammolar ijobiy yechimini topdi.

Ayni kunda 2 ming nafardan ziyod aholi istiqomat qilayotgan “Ibn Sino” mahallasida deputat sektor rahbari, mahallada faoliyat olib borayotgan hokim yordamchisi, yoshlar yetakchisi bilan hamkorlikda “Ayollar daftari”, “Yoshlar daftari” ga kiritilgan fuqarolarning muammolarini hal etish, qiyin sharoitda yashayotgan oilalarga yordam berish, shuningdek, ishsiz aholi bandligini taʼminlash, har bir oilaning daromad manbaini shakllantirish masalalariga alohida eʼtibor qaratmoqda.

Deputat tomonidan tumandagi saylovchilar bilan yakkama-yakka muloqot oʻrnatish maqsadida olib borilgan muloqotlarda mazkur MFY da istiqomat qiluvchi fuqarolar tomonidan mahallada toza ichimlik suvi yoʻqligi, mazkur muammoni hal qilib berishda amaliy yordam soʻrab murojaatlar qilishdi.Shuningdek, mahalla ichki koʻchalari ham juda taʼmirtalab ekanligini aytib bu muammoni ham hal qilib berishlarini iltimos qilishdi. Murojaatlar yuzasidan deputat Oʻrol Sherxonov tomonidan mahallaga toza ichimlik suvi keltirish yuzasidan “Suvoqova” tuman boʻlimi rahbariyatiga va “Ibn Sino” MFY hududidagi ichki koʻchalarini taʼmirlash toʻgʻrisidagi murojaat yuzasidan tuman Yoʻllardan foydalanish va taʼmirlash korxonasi rahbariyati nomiga deputatlik soʻrovi yuborildi. Deputat bu masalalarni oʻz nazoratiga olishini fuqarolarga bildirdi.

Shuningdek, aholi bilan uchrashuvda mahallada yashovchi Xurshida Mahmudova koʻrish qobiliyati pastligi, yashash sharoiti ogʻirligi sababli nogironlik nafaqasiga chiqish uchun belgilangan talablarni bajarishga qiynalayotganligi, bu borada yordam koʻrsatilishini soʻrab, deputatga murojaat qildi. Deputat ushbu murojaat boʻyicha mutasaddi tashkilotlar vakillari bilan bogʻlanib, muammoni ijobiy hal etish choralarini koʻrdi va murojaat ijrosini oʻz nazoratiga oldi.Deputatning oʻrganishlari davom etmoqda.

Dilafroʻz Rahmatova,

Oʻzbekiston “Adolat” SDP mafkuraviy ishlar boʻyicha bosh mutaxassisi.