Deputat tashabbusi bilan

Xalq deputatlari Kosonsoy tumani kengashidagi safdoshlarimiz oʻz faoliyatlarini yuqori darajada olib borish intilmoqdalar. Saylovchilar bilan uchrashuvlar belgilangan jadval asosida oʻz vaqtida oʻtkazilmoqda. Aholining turli qatlamlari vakillarining talab va ehtiyojlari muntazam oʻrganilmoqda. Shu asosida qator tadbirlar ham tashkil etilmoqda.

Masalan, yaqinda 2-sonli kasb-hunar maktabida mini futbol boʻyicha uyushmagan yoshlar oʻrtasida mahallalararo musobaqa oʻtkazildi. Uni tashkil etishdan maqsad yoshlarni boʻsh vaqtini mazmunli oʻtkazishlari va sogʻlom turmush tarzini targʻib etish edi. Musobaqaga tuman kengashidagi “Adolat” SDP guruhi rahbari Isroiljon Joʻrayev homiylik qildi. Gʻoliblik uchun shu atrofdagi mahallalardan kelgan 16 ta jamoa kurash olib bordi. Har bir oʻyin muxlislarning qizgʻin olqishlari ostida oʻtdi.

Hal qiluvchi uchrashuvda “Beshketmon-2005” hamda “Navbahor” jamoalari kuch sinashishdi. Asosiy vaqt 3:3 hisobida durang natija bilan yakunlandi. Penaltilar boʻyicha “Navbahor” jamoasining qoʻli baland keldi. Ularga deputatlik guruhi taʼsis etgan kubok va “Adolat” SDP viloyat kengashining esdalik sovgʻalari topshirildi.

- Mazkur musobaqa mahallalarimizda futbol muxlislari safi kengayib borayotganligini yana bir bor koʻrsatdi, — deydi Xalq deputatlari Kosonsoy tumani kengashi deputati Isroiljon Joʻrayev. — Shundan kelib chiqib, biz boshqa hududlarda ham bu kabi birinchiliklar tashkil etishga qaror qildik. Hozir tayyorgarlik ishlari olib borilmoqda.

Ha, deputat boshlagan tashabbus tobora keng quloch yoymoqda.

Nurbek ABDULLAYEV,
“Adolat” SDP Namangan viloyat
Kengashi matbuot kotibi.