Deputatimiz tashabbusi bilan xayriya tadbiri tashkil etildi

Bugun mamlakatimizda kuzatilayotgan anomal sovuq kunlarida kam taʼminlangan hamda ijtimoiy himoyaga muhtoj aholi holidan xabar olish, ularning qisman boʻlsa-da mushkulini osonlashtirish maqsadida partiyamiz deputatlari tomonidan xayriya tadbirlari oʻtkazilmoqda.

Oʻzbekiston “Adolat” SDP Navoiy viloyat Kengashi raisi, xalq deputatlari viloyat Kengashi deputati Rustam Hayitov tashabbusi bilan Navoiy shahridagi “Golden lift” qoʻshma korxonasi va “Vial” masʼuliyati cheklangan jamiyati direktori, tadbirkor Joʻraboy Jiyanov homiyligida Navoiy viloyatining Navbahor tumanidagi “Yangi yoʻl”, “Paxtakor”, “Qorovultepa”, “Gʻujbogʻtepa” mahallalarida istiqomat qiluvchi ijtimoiy himoyaga muhtoj, nogiron hamda “Ayollar” va “Temir” daftarlarida turuvchi 70 dan ortiq fuqarolar xonadoniga borib, oziq-ovqat mahsulotlari ulashildi.

Shuningdek, havo haroratining sovuq boʻlishiga qaramasdan mahallalarda xizmat vazifasini bajarayotgan obodonlashtirish, avtoyoʻl va boshqa xizmat koʻrsatish xodimlari, nuroniy otaxon va onaxonlar hamda fuqarolar uchun osh tarqatildi.

Qayd etish kerakki, Oʻzbekiston “Adolat” sotsial-demokratik partiyasi tomonidan bu kabi xayrli ishlarni tashkil etish anʼana tusiga kirgan. Ayniqsa, bu borada saxovatli tadbirkorlarning beminnat koʻmagi nihoyatda muhim ahamiyat kasb etmoqda.

Saxovat tadbirlari viloyat boʻylab davom etmoqda.

Oʻzbekiston “Adolat” SDP Navoiy viloyat kengashi
Matbuot xizmati