Deputatlar hududlarda oʻrganishlar olib borishmoqda

Shu kunlarda xalq vakillarining aholi bilan yuzma-yuz uchrashuvlari muammolarga yechim topishda qoʻl kelmoqda. Xususan, Xalq deputatlari Surxondaryo viloyat Kengashi deputatlari tumanlardagi saylovchilari bilan uchrashuvlarida maktablar faoliyati, mahallalarda olib borilayotgan ishlar va aholi murojaatlari bilan yaqindan tanishib kelmoqdalar..

Xususan, Xalq deputatlari Surxondaryo viloyati Kengashi deputati Rustam Hamrayev Shoʻrchi tumanidagi “Nuroniylar jamoatchilik Kengashi” vakillari bilan hamkorlikda tumandagi umumtaʼlim maktablarida boʻlib maktablar holati, darslar sifati, muallimlar muammolarini oʻrgandi.

Prezidentimizning xalq taʼlimi sohasidagi islohotlarning natijadorligiga qaratilgan bildirilgan fikrlar, gʻoya va tashabbuslar, belgilab berilgan ustuvor vazifalarning mazmun-mohiyati yuzasidan tushuntirishlar olib borish ham deputatlarning doimiy eʼtiborida. Endigi navbat darslar sifatini yaxshilashga qaratilgan.

Deputatlar tuman maktablaridagi taʼlim tizimida amalga oshirilayotgan ulkan islohotlar va ularning muvaffaqiyati, davlatimiz rahbarining bu borada eʼlon qilgan navbatdagi farmonida koʻrsatilgan chora-tadbirlarni amalga oshirish yuzasidan pedagoglar bilan ochiq muloqot ham oʻtkazishdi. Unda qayd etilganidek, oʻrta taʼlim tizimini zamon talablariga moslashtirish, maktab darsliklarini yangilash dasturini amalga oshirish uchun davlat byudjetidan 605 milliard soʻm ajratilishi, 141 mingta yangi oʻquv oʻrinlari yaratilishi hamda ularning soni 2026 yil yakuniga qadar 6,4 milliongacha yetkazilishi yurtimizda olib borilayotgan keng koʻlamli islohotlar natijasi ekanligi taʼkidlandi.

Shuningdek, deputatlar tuman tibbiyot birlashmasida shifoxonada yaratilgan shart-sharoitlar bilan tanishib, salomatligini tiklayotgan bemorlar holidan xabar olib, ular bilan dildan suhbatlashdi. Deputatlar tibbiyot birlashmasi hovlisini aylanib, obodonlashtirish va koʻkalamzorlashtirish ishlarini koʻzdan kechirishdi.

Fayzulla Ahmedov, partiya Shoʻrchi tuman Kengashi faoli:

- Bu yilgi Dastur asosida shifoxonada zamonaviy tibbiy jihozlar oʻrnatilishi rejalashtirilmoqda. Mazkur loyiha amalga oshirilgach tuman aholisini olis va chekka, viloyat hamda poytaxt kasalxonalariga tibbiy apparatlar uchun tekshiruvlarga borishlariga hojat qolmaydi. Ushbu zamonaviy shifoxonaning bugungi kunda pardozlash va moddiy texnika bazalar bilan taʼminlash ishlari olib borilmoqda

Uchrashuvlar davomida oʻrganilgan muammolar yuzasidan tegishli mutasaddilar orqali hal qilinishi choralari belgilandi. 

Muyassar Qurbonova,

Oʻzbekiston “Adolat” SDP Surxondaryo viloyat Kengashi mutaxassisi