Deputatlar mahallada-muammolar yechimi sari

Bugungi kunda deputatlar xalq va hukumat oʻrtasidagi ularni bogʻlab turuvchi koʻprik, desak mubolagʻa boʻlmaydi. Ular endilikda chin maʼnoda xalq vakillari ekanliklarini amalda namoyon etmoqdalar. Tashabbuskor, yuragida oʻti bor, odamlar dardu tashvishi bilan yuradigan koʻplab ana shunday fidoyilar saʼy-harakati oʻlaroq, koʻplab loyihalar amaliyotga tatbiq etilib, yana qanchadan-qancha muammolar hal qilinib kelinmoqda.

Xususan, Surxondaryoda ham xalq noiblari partiyaning “Muammo bilan yuzma yuz” loyihasi doirasida mahallalarda boʻlib aholi bilan yuzma yuz muloqotlar olib borishmoqda, Jumladan, Xalq deputatlari Denov tuman Kengashi deputatlari Gavhar Shoimova va Orif Qilichevlar tumandagi “Bogʻi eram” mahallasida boʻlishib, aholi bilan yuzma-yuz muloqot qildilar.

Xalq deputatlari tuman Kengashiga partiyamizdan saylangan deputatlar bilan hamkorlikda mahalladagi 15 dan ziyod xonadonda boʻlib, 50 dan ortiq fuqaro bilan muloqot oʻtkazdik, – deydi mahalla faoli Noila Xasanova.- 30 dan ortiq fuqaroga kichik biznes va xususiy tadbirkorlik bilan shugʻullanish, bankning imtiyozli krediti evaziga issiqxonalar qurish, parranda boqish, limon va yongʻoq ekish orqali qoʻshimcha daromadga ega boʻlish yuzasidan tushuntirish-targʻibot ishlari amalga oshirildi.

Deputatlar mahalla faollari bilan birgalikda aholiga mahalladagi ichki yoʻllarni taʼmirlash, elektr tarmoqlarini tortish va almashtirish, gaz taqsimlash punktlarini taʼmirlash, ichimlik suvi taʼminotini yaxshilash, mahallalarda sport maydonchasi va bolalar oʻyin maydonchasi tashkil etish kabi ishlar amalga oshirilayotgani toʻgʻrisida targʻibot ishlari olib borildi.

Deputatlar tomonidan mahalladagi “Temir daftar”, “Ayollar daftari”, “Yoshlar daftari”ga kiritilgan ayollarning xonadonlariga kirib, ularning holidan xabar olindi. “Temir daftari”da roʻyxatda turuvchi, bugungi kunda sogʻligi yomonlashib tuman Markaziy shifoxonasida davolanayotgan D.Murodovning xolidan xabar olinib, koʻrsatilayotgan tibbiy xizmat ahvolini oʻrgandilar.

Shuningdek, deputatlar tomonidan ijtimoiy himoyaga muhtoj oilalardagi mavjud muammolarni bartaraf etishda koʻmaklashish boʻyicha choralar belgilandi. Chorvachilik, parrandachilik bilan shugʻullanish istagini bildirgan yoshlarga kredit ajratishda amaliy yordam soʻrab tijorat banklariga deputat soʻrovi bilan murojaat qilishga kelishildi.

Shuningdek deputatlar ehtiyojmand keksalar xonadonidan xabar oldilar. Mazkur ehtiyojmand fuqarolarga oziq-ovqat mahsulotlari topshirib, ularning muammolarini oʻrgandilar. Mahallada aniqlangan taʼmirtalab ichki yoʻllarga shagʻal bilan qoplash uchun tegishli tashkilotlarga murojaat qilish choralarini koʻrdilar.

Yana shuningdek, deputatlar mahallada joylashgan 50-umumtaʼlim maktabida ham boʻlib, maktab jamoasi bilan ham suhbatda boʻlishdi. Sinfxonalar, maktab kutubxonasida boʻlishib, muammolarni oʻrganishdi.

Muloqotlar jarayonida aniqlangan va aholi tomonidan bildirilgan muammolar tegishli tashkilotlarga topshirilib, ijrosi nazoratga olindi.

Dilafro‘z Rahmatova,

O‘zbekiston “Adolat” SDP

Surxondaryo viloyat Kengashi bosh mutaxassisi.