Deputatlik guruhida xayrli ishlar uzviy davom ettirilmoqda

Soʻngi yillarda “Adolat” sotsial-demokratik partiyasidan saylangan Toshkent shahar Kengashi deputatlik guruhining faoliyati yanada jonlandi. Buni kengash tarkibida faoliyat yuritayotgan deputatlar ishida yaqqol kuzatish mumkin. Aytaylik, deputatlardan biri Toshpoʻlat Matibayev xalq dardi bilan yashab, ularning ogʻirini yengil qilib kelishga intilmoqda. Joriy yil boshidan ham deputat ushbu xayrli ishlarini sidqidildan davom ettirib kelmoqda. Jumladan, ancha yillardan buyon bahs va monozalarga sabab boʻlib kelayotgan “Yangi zamon” mahalla idorasi binosini zamonaviy qilib taʼmirlatishda tegishli mutasaddi tashkilotlarga murojaat etish orqali amaliy yordam koʻrsatdi. Bundan yangi zamonliklar behad mamnun boʻldi. Chunki ular koʻnglidagidek mahalladagi eski binolarini saqlab qolib, uni zamonaviy taʼmirlatish maqsadlarini amalga oshirishdi.

Shuningdek, anomal sovuq davrida poytaxtimiz Toshkentda elektr energiyasi bilan bogʻliq turli muammolar va nosozliklar kelib chiqdi. Shu sababli aholi yashash turmush sharoiti sezilarli darajada pasaygani haqida deyarli har kuni ijtimoiy tarmoqning turli sahifalarida postlar koʻzga tashlandi. Shunday sharoitda Mirobod tumanidagi “Oq uy” mahallasidan deputat T.Matibayevga murojaat kelib tushdi. Murojaatda keltirilishicha, Eski Otchopar koʻchasidagi transformatorda texnik nosozlik yuzaga kelgani aytildi. Deputat darhol ushbu muammoli vaziyatni oʻz nazoratiga olib, ijobiy hal etilishida koʻmak koʻrsatdi. Shu kabi ezgu ishlarni boshqa deputatlar faoliyatida kuzatish mumkin.

Yurtimizda amalga oshirilayotgan islohotlarning jadal suratlarda namoyon boʻlishida shahar kengashi deputatlarining xizmati beqiyos. Xususan, Xalq deputatlari Toshkent shahar kengashi deputati Hikmatova Luiza Anvarovna Olmazor tumanidagi 9 ta mahalla yoshlar yetakchilariga sport anjomlari berilishida amaliy yordam koʻrsatdi. Maqsad aholi orasida, ayniqsa, yoshlar oʻrtasida sportni keng ommalashtirish, ularning muntazam sport bilan shugʻullanishlari uchun sharoitlar yaratib berish koʻzda tutildi. Deputat L.Xikmatova bu kabi tadbirlarni oʻzi rahbarlik qilib kelayotgan Olmazor tumanidagi suv sport turlariga ixtisoslashtirilgan maktab internatida doimiy tarzda tashkillashtirib keladi. Bolalar va oʻsmirlar oʻrtasida turli sport musobaqalari oʻtkazib, homiylarni jalb etadi. Shu kungacha deputatning saʼy-harakatlari tufayli maktablar, bogʻchalar va shu kabi turli oʻquv muassasalari kapital taʼmirdan chiqarildi, moddiy-texnik bazasi asbob-uskunalari bilan yangilandi. Deputat yaqinda boʻlib oʻtgan referendum yuzasidan “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasining mazmuni va mohiyatini keng aholiga tushuntirish va targʻib qilish ishlarida faol qatnashdi.

Deputatlik guruhi tarkibidagi yana bir fidoyi deputatlardan biri 28-Yoʻldosh saylov okrugidan saylangan Tursunov Sobir Turdiyevichdir. S.Tursunov joriy yil boshida “Yangi umid” MFY hududida barpo etilayotgan “Suzish havzasi” hamda “Bolalar sport majmuasi” ning qurilish jarayoni loyiha ishlari boʻyicha muzokara oʻtkazib, oʻzi nazorat qilib bordi. Shuningdek koʻpgina mahallalarda, xususan, “Yangi umid” va “Tashabbus” MFYlarida yashovchi ijtimoiy himoyaga muhtoj bemorlar xonadonlariga tashrif buyurib, ularga davolanishlari uchun yaqindan amaliy yordam koʻrsatdi. Deputat tashabbusi bilan “Yashil makon” umummilliy loyihasi doirasida bahorgi mavsum uchun 350 dan ortiq mevali va manzarali daraxtlar ekildi. Bunday xayrli ishlar qatorini misollar asosida yana uzoq keltirish mumkin. Eng asosiysi, deputat xalqqa bergan vaʼdasi ustidan chiqmoqda.

Deputatlik guruhi tarkibidan oʻrin olgan Husniddin Ergashev, Nodira Gʻoyibnazarova, Bexzod Toʻxtamurodov, Suxrob Saifnazarov, Botir Daminov, Sadriddin Turobjonov, Dilorom Toshmuhammedova, Abdumavlon Qosimovlar ham oʻz malakalari asosida va berilgan vakolatlari doirasida koʻplab xayrli ishlarni amalga oshirdilar. Poytaxt aholisi uchun qulay va manfaatli boʻlgan qarorlar chiqarilishiga erishdilar va ularning ijro etilishida bosh-qosh boʻlishdi. Referendum boʻyicha olib borilgan targʻibot-tashviqot ishlarining ham eng faol tashabbuskoriga aylandilar.

Mehriniso Yakubova,

“Adolat” SDP Toshkent shahar Kengashi matbuot kotibi.