Dolzarb qonun loyihalari muhokama qilindi

Oliy Majlis Qonunchilik palatasidagi “Adolat” SDP fraksiyasi yig‘ilishida “Voyaga yetmaganlarga nisbatan jinoiy javobgarlik yanada liberallashtirilishi munosabati bilan O‘zbekiston Respublikasi Jinoyat kodeksining 77 va 85-moddalariga o‘zgartish va qo‘shimcha kiritish to‘g‘risida”gi qonun loyihasi muhokama qilindi.

Ta’kidlanganidek, mamlakatimizda bolalarning sog‘lom va barkamol bo‘lib voyaga yetishi, zamonaviy bilim olishi, o‘z qobiliyat va iqtidorini namoyon etishi uchun barcha sharoit yaratilmoqda. Ayniqsa, oxirgi yetti yilda bola manfaatlarini himoya qilishga qaratilgan keng ko‘lamli islohotlar amalga oshirildi.

Voyaga yetmaganlarning huquq va erkinliklarini himoya qilish hamda qonuniy manfaatlarini ta’minlash, bolaning jismoniy, aqliy va madaniy jihatdan to‘liq rivojlanishi uchun munosib shart-sharoitlar yaratish davlat siyosati darajasiga ko‘tarildi. Chunki davlat bolaning hayoti va sog‘lig‘ini muhofaza qilish, kamsitilishiga yo‘l qo‘ymaslik, sha’ni va qadr-qimmatini himoya qilishda bosh islohotchi hisoblanadi.

Yangi tahrirdagi Konstitutsiyamizning 77-moddasida ham davlat va jamiyat yetim bolalarni hamda ota-onasining vasiyligidan mahrum bo‘lgan bolalarni boqishni, tarbiyalashni, ularning ta’lim olishini, sog‘lom, to‘laqonli va har tomonlama kamol topishini ta’minlaydi, shu maqsadda xayriya faoliyatini rag‘batlantiradi, deb belgilab qo‘yildi. Shubhasiz, davlat bola huquq va manfaatlarining himoyasini, har tomonlama rivojlanishiga sharoit yaratishni o‘z zimmasiga olar ekan, buning uchun barcha zarur choralarni ko‘radi.

Ushbu qonun loyihasi bilan Jinoyat kodeksining 77-moddasi yangi qism bilan to‘ldirilib, o‘n sakkiz yoshga to‘lguniga qadar sodir etgan jinoyati uchun (o‘ta og‘ir jinoyatlar bundan mustasno) shaxs jazoni o‘tab bo‘lganidan so‘ng sudlanmagan deb hisoblanishi belgilanmoqda.

Shuningdek, 85-moddasida voyaga yetmaganga nisbatan tayinlanadigan ozodlikdan mahrum qilish jazosining eng kam muddati olti oydan bir oyga tushirish nazarda tutilyapti.

Qonun loyihasining qabul qilinishi voyaga yetmaganlarning jinoiy javobgarligini yanada liberallashtirib, voyaga yetmagan davrida sodir etgan jinoyati uchun jazoni to‘liq o‘tab bo‘lgan shaxsga o‘z hayotini sudlanganlik tamg‘asidan xoli tarzda yangidan boshlashiga imkon beradi.

Muhokamalar davomida fraksiya a’zolari qonun loyihasining muhimligi, ayni chog‘da zarurligini e’tiborga olib, uni yanada takomillashtirish bo‘yicha partiya maqsad va vazifalaridan kelib chiqib, qator takliflar berishdi.

Qizg‘in kechgan baxs-munozaralardan so‘ng, mazkur qonun loyihasi deputatlar tomonidan ma’qullandi.

Yig‘ilishda fraksiya vakolatiga taalluqli boshqa masalalar ham ko‘rib chiqildi.