Dorivor o’simliklar xalqimizning tabiiy boyligidir

Shifobaxsh giyohlardan dori-darmon sifatida foydalanish juda qadimiy odat bo‘lib, uning tarixi insonning shakllanish davridan boshlangan. Insonlar salomatligini tiklashda shifobaxsh o‘simliklarning roli beqiyosligi bois, aholi o‘rtasida o‘simlik xomashyolaridan tayyorlangan dori-darmonlarga bo‘lgan talab yildan-yilga ortib bormoqda.

Buyuk allomamiz,  Evropa davlatlarida Avitsenna nomi bilan tanilgan Abu Ali Ibn Sino o‘zining “Tib qonunlari” kitobida o‘simliklarni shifobaxsh xususiyatlarini aytib o‘tgan, qolaversa bemorlarni davolagan.

Mamlakatimizda so‘nggi yillarda dorivor o‘simliklarni muhofaza qilish, tabiiy resurslardan oqilona foydalanish, dorivor o‘simliklar yetishtiriladigan plantatsiyalar tashkil etish va ularni qayta ishlash borasida izchil islohotlar amalga oshirilmoqda. Soha rivoji maqsadida davlatimiz rahbarining 2022 yil 20 maydagi «Dorivor o‘simliklarni madaniy holda yetishtirish va qayta ishlash hamda davolashda ulardan keng foydalanishni tashkil etish chora-tadbirlari to‘g‘risida» gi Qarorida ham bir qator vazifalar belgilab qo‘yilgan.

Inson salomatligida dorivor o‘simliklar dolzarb ahamiyat kasb etadi. Hozirgi kunda Respublikamizda 120 turdan ortiq dorivor o‘simliklar  rasmiy tabobatda foydalanishga ruxsat berilgan bo‘lib, ushbu o‘simliklar tabiiy  holda yig‘ib olinadi va madaniy holda o‘rmon fondi yerlarida yetishtiriladi.

Oʻzbekiston “Adolat” SDP Baxmal tuman Kengashi tomonidan partiya faollari, mahalliy Kengash deputatlari, mutasaddi tashkilotlardan iborat ishchi guruh tuzilib, tumandagi “Uzunbuloq” QFYda dorivor o’simliklarni oʻrganish ishlari olib borildi.

Oʻrganishlar davomida, “BMB Trade Group” klasteri tomonidan Baxmal tumani “Uzunbuloq” QFY hududida za’faron yetishtirish va qayta ishlash yo‘lga qo‘yilgan bo’lib,  305 gektar maydonga za’faron plantatsiyalari tashkil etilganligi va bu plantatsiyalarning bugungi kundagi faoliyati hamda za’faron o’simligini ekish, parvarishlash va yig’ib olish ishlari yaqindan o’rganib chiqildi. Bu o‘simlikni yetishtirish va xom ashyoni terib olish faqat qo‘l mehnati bilan amalga oshirilgani uchun ham juda qimmatbaho o’simlik ekanligi ma’lum bo’ldi.

Ma’lumki, Za’faron dorishunoslik sanoatida keng ishlatiladi, u sharq tabobatining 300 dan ortiq dori-darmonlari tarkibiga kiradi. Za’faron dorivor o’simlik bo’lib, undan ovqat hazm qilishni yaxshilash, ishtahani ochish, organizmning hayotiy faolligini yaxshilash, nafas olish a’zolari va asab tizimini mustahkamlash, buyraklarni tozalashda, og‘riqni qoldirishda, tinchlantiruvchi, peshob, o‘t va ter haydovchi vosita sifatida foydalanishadi.

Shuningdek, “BMB Za’faron” kompaniyasi tomonidan Jizzax shahrida za’faron qo‘shilgan keng assortimentdagi taomlarni taklif etishga mo‘ljallangan BMB Za’faron brendi ostidagi restoran joriy yilning iyul oyidan boshlab mijozlarni qabul qilishni boshlagan.

Aholining tibbiy madaniyatini oshirish, dorivor oʻsimliklarning afzalliklarini aholi va shifokorlar orasida keng targʻib qilish, dorivor oʻsimliklarni yetishtirish va chuqur qayta ishlashda ilm-fan va ishlab chiqarish korxonalarining aloqalarini yoʻlga qoʻyish xalq tabobati rivoji hamda aholi salomatligiga xizmat qiladi.

Partiyamiz tomonidan dorivor oʻsimliklarni joylarda yetishtirish boʻyicha amalga oshirilgan ishlarni jamoatchilik nazorati tartibida oʻrganish tashabbusi sohani yanada rivojlantirish hamda aholi salomatligini mustahkamlashga xizmat qiladi.

Shahnoza Soatova,

“Adolat” SDP Jizzax viloyat Kengashi bosh mutaxassisi.