Eng ulugʻ, eng aziz bayram

Mustaqillik — erkin va baxtli yashash, inson huquq va erkinliklari, uning qonuniy manfaatlarini taʼminlashning bosh omili. Har bir fuqaroning oʻzligini, oʻz qadr-qimmati, or-nomusi va gʻururini teran anglashi uchun cheksiz va buyuk imkoniyat. Biz kimlarning, qanday buyuk zotlarning avlodi ekanimizni chuqur idrok etish, milliy va umuminsoniy qadriyatlar uygʻunligi ruhida yashash, istiqlol gʻoyalarini yurtdoshlarimiz ongiga singdirish, jahon hamjamiyatidan munosib oʻrin egallash va milliy taraqqiyotimiz kafolati, demakdir. Shu sabab bu kun eng ulugʻ, eng aziz bayram sifatida nishonlashga munosib.

Mana 32 yildirki biz ana shunday baxt va imkoniyat bilan yashamoqdamiz. Istiqlol yillarida bosib oʻtilgan tarixiy yoʻl xalqimizni qanday kuch-qudratga ega ekanligini koʻrsatadi. Olib borilgan faoliyatning mazmun-mohiyati va pirovard natijasi eng oliy qadriyat hisoblanmish inson uchun, uning baxt-saodati uchun, tinch va farovon hayoti uchun muhim ahamiyatga ega. Erishilgan yutuqlarning eng asosiysi — yurtimizdagi tinchlik va barqarorlikdir. Qisqa davrda erishilgan yutuqlar oʻzining olamshumulligi bilan qalbimizda faxr-iftixor tuygʻularini uygʻotadi.

Mustaqillik bayramini har yili eng ulugʻ, eng aziz bayram sifatida nishonlanishi bejiz emas. Bu kun kimningdir koʻrsatmasi yoki topshirigʻi bilan bayram qilinmaydi. Yurtdoshlarimiz oʻz xohishi va yurak amri bilan bayram tantanalarida qatnashadi. Chunki istiqlol barchamiz uchun qadrli, bebaho.

Istiqlol oʻz taqdirining haqiqiy egasi boʻlib, qadr-qimmatini anglab, munosib hayot kechirish, yurtimizda huquqiy demokratik davlat va fuqarolik jamiyatini barpo etish imkoniyatini yaratdi. Ayni paytda u har bir fuqaroning iqtisodiy, ijtimoiy sohalarda isteʼdod va qobiliyatini toʻla namoyon etishi, huquq va erkinliklarini roʻyobga chiqarishining mustahkam zaminidir.

“Mustaqillik” va “islohot” tushunchalari mushtarak soʻzlardir. Chunki mustaqil davlat va mustaqil jamiyatdagina islohotlarni amalga oshirish mumkin. Mustaqillik ham, islohotlar ham insonning yaxshi yashashi, munosib turmush darajasiga erishishi uchun zarur sharoit yaratdi.      

Xulosa qilib aytganda, olib borilayotgan islohotlar samarasini yanada oshirish, davlat va jamiyat rivojini yangi bosqichga koʻtarish bugun oldimizda turgan eng dolzarb vazifa. Birdamlikda bu yoʻlda dadil odimlar bilan Yangi Oʻzbekistonni yaratamiz!

Maloxatxon Musayeva,

“Adolat” SDP Andijon viloyat kengashi raisi oʻrinbosari.