Fuqarolar haq huquqlari taʼminlangan jamiyat barpo etamiz

Oʻzbekiston “Adolat” SDP dan Oʻzbekiston Respublikasi Prezidentligiga nomzod Robaxon Maxmudovaning viloyatdagi ishonchli vakili Ruiddin Raupovning saylovchilar bilan uchrashuvlari davom etmoqda. Bugun Ruiddin Raupov Qashqadaryo arxitektura va qurilish texnikumi tadbirgohida Shahrisabz tumani saylovchilari bilan uchrashdi.

-Qaysiki mamlakatda qonun ustuvor ekan, oʻsha jamiyatda tinchlik va osoyishtalik hukm suradi,-dedi Ruiddin Raupov. -Taraqqiyotning barqaror va bardavomligi taʼminlanadi. Oʻsha yurtda umrguzaronlik qilayotgan xalqning davlat siyosatiga va kelajakka boʻlgan ishonchi ortadi. Nomzod saylovoldi dasturida qonun ustuvorligi adolatli jamiyat qurishning muhim sharti degan tamoyil ilgari surilayotganligi ham bejiz emas. Biz uchun oliy qadriyat bu inson, uning huquq va erkinliklaridir.

Uchrashuvda sudyalar sonini koʻpaytirish, ularning ixtisoslashuvini yanada kengaytirish zarurligi nomzod dasturida ilgari surilgan. Umuman qonun asosida yashash har birimizning hayot tarzimizga aylanishi shart.

Birinchi navbatda sud va huquqni muhofaza qiluvchi organlarning ish uslubini oʻzgartirish, ular faoliyatida amal qilib kelayotgan ayrim eskicha yondashuvlarni bartaraf qilish, yaʼni jazolash gʻoyasidan adolat, tenglik, erkinlik gʻoyalariga oʻtish zarur deb hisoblaymiz.

Fuqarolarning huquqlarini taʼminlash va munosib himoya qilishda advokatlarning oʻrni va roli beqiyos. Shu bois odil sudlovni taʼminlashda advokatga berilgan huquqlarni qayta koʻrib chiqish zarur ekanligini hayotning oʻzi tasdiqlamoqda.

Uchrashuvda Ruiddin Raupov nomzod dasturida ustuvor vazifa etib belgilangan korrupsiyadan holi adolatli jamiyat qurish, parlament demokratiyasini yanada rivojlantirish, tadbirkorlik subyektlariga qoʻshimcha xarajatlar yuklaydigan barcha qoidalarni faqat qonunlar orqali qabul qilinishiga erishish, deputatlarning ish vaqtini yarmini oʻz saylovchilari yonida oʻtkazishini belgilovchi tartibni joriy etish, mahalliy ijroiya hokimiyati organlari   ustidan deputatlik nazoratini kuchaytirish yoʻnalishlari xususida ham toʻxtaldi.

                                                                  Samandar Ixtiyorov,

                                                                   partiya faoli.