Har bir oilada teng huquq va adolat taʼminlanishi kerak

Adolatli jamiyat barpo etishda ayollar va erkaklarning teng huquqliligini taʼminlash, xotin-qizlarning turli soha va tarmoqlarda oʻz qobiliyat va imkoniyatlarini roʻyobga chiqarish uchun shart-sharoitlar yaratish, onalik va bolalikni qoʻllab-quvvatlashga oid qonun hujjatlarini ishlab chiqish va takomillashtirish Oʻzbekiston Respublikasi Prezidentligiga nomzod Robaxon Mahmudovaning saylovoldi dasturida ustuvor vazifa etib belgilangan.

Bugun nomzodning Qashqadaryo viloyatidagi ishonchli vakili Ruiddin Raupovning Shahrisabz shahar saylovchilari bilan boʻlib oʻtgan uchrashuvida ham ayol muqaddas oila –jamiyat asosi ekanligi alohida eʼtirof etildi. Toshkent kimyo-texnologiya instituti Shaxrisabz filiali tadbirgohida boʻlib oʻtgan uchrashuvda oʻqituvchilar, tibbiyot xodimlari, mahallalar aʼzolari, keng jamoatchilik va ommaviy axborot vositalari vakillari qatnashdi.

-Nomzodning saylovoldi dasturida oila jamiyatning asosiy boʻgʻini hamda jamiyat va davlat muhofazasida ekanligi alohida qayd etilgan,-dedi Ruiddin Raupov.- Davlat yangi Oʻzbekistondagi har bir oilaning toʻlaqonli rivojlanishi uchun ijtimoiy, iqtisodiy, huquqiy va boshqa shart-sharoitlar yaratishi, onalik, otalik va bolalik davlat tomonidan muhofaza qilinishi, Oʻzbekiston Respublikasi Vazirlar Mahkamasi oilani qoʻllab-quvvatlash, mustahkamlash va himoya qilish, anʼanaviy oilaviy qadriyatlarni saqlash boʻyicha choralar koʻrishi alohida belgilangan. Shulardan kelib chiqqan holda “Onalik, otalik va bolalikni davlat muhofazasi toʻgʻrisida”gi qonunni qabul qilish tashabbusi saylovoldi dasturda ilgari surilgan.

Shuningdek nomzodning saylovoldi dasturida barcha oilalarda teng huquqli va adolatli munosabatni, maʼnaviy-axloqiy muhitni mustahkamlash va sogʻlomlashtirishning samarali mexanizmlarini yaratishga asosiy eʼtibor qaratilgan.Xususan, reproduktiv salomatlik va demografik rivojlanishni barqaror taʼminlash maqsadida, “Sogʻlom oila – sogʻlom jamiyat 2030” dasturini ishlab chiqishga ham eʼtibor qaratilgan.

Uchrashuvda ishonchli vakil nomzod dasturida ilgari surilgan sogʻliqni saqlash, taʼlim, ona tabiatni asrab avaylash, jamiyatda ijtimoiy adolatni qaror toptirish borasida belgilangan ustuvor yoʻnalishlar xususida ham toʻxtaldi.

Samariddin Zayniddinov,

Xalq deputatlari Shahrisabz shahar Kengashi deputati.