Hududlarda oʻrganish ishlari qizgʻin kechmoqda

Keyingi yillarda hududlarda uyma-uy, xonadonma-xonadon yurib, odamlar bilan yaqindan muloqotda boʻlish, ularning yashash sharoiti, turmush tarzidan kelib chiqib, bevosita oʻzlari bilan bamaslahat mavjud muammolarni hal qilish deputatlarimiz faoliyatining asosiy mezoniga aylandi.

Bugun xalq vakillari har bir tuman va shaharga, kerak boʻlsa, chekka-chekka qishloq va ovullargacha kirib borib, aholi bilan yaqindan muloqot qilmoqda, odamlarning dardini eshitib, toʻplanib qolgan muammolarni hal etmoqda.

Mahallalar infratuzilmasini yaxshilash boʻyicha Prezidentimizning Farmon va qarorlari qabul qilinib, tegishli vazifalar belgilab berilgan. Topshiriqqa koʻra Termiz tumanida ham mahallalar ichki yoʻllarini taʼmirlash, piyodalar yoʻlaklari qurish, ichimlik suvi, elektr energiyasi taʼminotini yaxshilash va boshqa masalalar boʻyicha qator ishlar amalga oshirilmoqda.

Har bir amalga oshirilayotgan ishlar yuzasidan jamoatchilik nazoratining oʻrnatilishi esa, bu boradagi ishlarning sifatli boʻlishiga xizmat qiladi. Xalq deputatlari Termiz tumani Kengashi huzuridagi “Xalqparvar” komissiyasi tarkibidagi ishchi guruhida faoliyat olib borayotgan partiyamiz deputatlari ham sohalarda jamoatchilik nazoratini oʻrnatish maqsadida mahallalarda bu borada amalga oshirilgan ishlar yuzasidan oʻrganishlar olib bormoqdalar.

Jumladan, tumandagi “Bunyodkor” va “At-Termiziy” mahallalaridagi qurilgan beton qoplamali ichki yoʻllar holati, “Tashabbusli byudjet” loyihasi doirasida “Yangiyer” mahallasidagi tibbiyot maskani, “Qahramon” mahallasidagi 5-sonli maktabdagi taʼmirlash ishlari koʻzdan kechirildi. Beton qoplamali yoʻllarni chekkalari toʻldirilmaganligi, kichik koʻpriklarga himoya toʻsinlari oʻrnatilmaganligi tanqid qilinib, tegishli tartibda masʼullarga kamchiliklar toʻgʻrisida axborot berildi.

Boʻri Xonov, Xalq deputatlari Termiz tumani Kengashi deputati:

Odamlar bilan yaqindan muloqotda boʻlmasdan turib, faqat qogʻozlarda qayd etilgan maʼlumotlar bilan joylarda kechayotgan ijtimoiy-iqtisodiy jarayonlarga, mavjud muammolarga baho berib boʻlmaydi. Shu bois, uchrashuvlarimiz davomida har bir murojaatni joyiga chiqib oʻrgandik, mutasaddilar bilan birgalikda ularga yechim topish choralarini koʻrdik. Chunki xalq bilan muloqotni yoʻlga qoʻyishda hisobot uchun ishlash emas, balki odamlarni oʻylantirayotgan masalalarga yechim topib, natija uchun ishlash kerak.

Shuningdek, tibbiyot maskani va maktabda olib borilayotgan qurilish-taʼmirlash ishlarini sifatli amalga oshirish boʻyicha tavsiyalar berilib, jarayonlar doimiy jamoatchilik nazoratida boʻlishi taʼkidlandi.

Shuxrat Xaitov,

Xalq deputatlari Termiz tuman Kengashi deputati.