Inson huquqlari bola huquqlarini ta’minlashdan boshlanadi

Oliy Majlis Qonunchilik palatasidagi “Adolat” SDP fraksiyasining navbatdagi yig‘ilishida “O‘zbekiston Respublikasi Oliy Majlisining Bola huquqlari bo‘yicha vakili (Bolalar ombudsmani) to‘g‘risida”gi qonun loyihasi birinchi o‘qishda ko‘rib chiqildi.

Mamlakatimizda bolaning huquqlari, erkinliklari va qonuniy manfaatlariga rioya qilish va ularni himoya qilish, bola huquqlari, erkinliklari va qonuniy manfaatlarini ta’minlash sohasidagi qonunchilikni takomillashtirish, nogironligi bo‘lgan bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlashga qaratilgan keng ko‘lamli ishlar amalga oshirilmoqda.

Bolalarga g‘amxo‘rlik qilish, ularni doimo qo‘llab-quvvatlash, huquqlarini himoya qilish, ularning jismoniy, intellektual, ma’naviy va axloqiy kamol topishiga ko‘maklashishga davlat siyosati darajasida katta e’tibor qaratilmoqda. Zero, hayotimiz davomchilari, kelajagimiz vorislari bo‘lgan bolalar mamlakatning katta xazinasidir.

Yig‘ilishda qayd etilganidek, bugungi kunda milliy qonunchiligimizda bola huquqlari bilan bog‘liq bo‘lgan qonun hujjatlari soni 40 dan, qonunosti hujjatlari soni 500 dan ortiqni tashkil etadi. Bu esa bola huquqlari sohasidagi qonunchilik bilan ixtisoslashgan holda ish olib borish hamda uning ijrosi bo‘yicha ta’sirchan mexanizmlarni yaratish zaruriyatini yuzaga keltirdi.

Taklif etilayotgan qonun loyihasida bola huquqlariga doir ko‘plab ustuvor vazifalar o‘rin olganki, loyihaning qabul qilinishi bolaning huquq va erkinlilarini himoya qilish borasida Bolalar ombudsmanining davlat organlari, huquqni muxofaza qiluvchi tashkilotlar va fuqarolik jamiyati institutlari bilan hamkorligi kuchayadi.

Bularning barchasi adolatni har bir inson uchun, har bir insonning huquqlarini eng oliy qadriyat deb hisoblovchi O‘zbekiston “Adolat” sotsial-demokratik partiyasi g‘oyalariga to‘la hamohangligi bilan ahamiyatlidir.

Muhokamalar davomida deputatlar partiya pozitsiyasidan kelib chiqib, qonun loyihasi yuzasidan o‘z takliflari, fikr-mulohazalarini bildirdi. Loyihadagi ayrim normalar yuzasidan bir qator savollarni o‘rtaga tashlashdi va ularga batafsil javoblar olindi.

Qizg‘in davom etgan baxs-munozaralardan so‘ng, qonun loyihasi deputatlar tomonidan ma’qullandi.

Yig‘ilishda kun tartibidan o‘rin olgan boshqa masalalar ham ko‘rib chiqilib, tegishli qarorlar qabul qilindi.