Iqtidorli va iste’dodli yoshlar — mamlakat taraqqiyotining tayanchi

Bugungi kunda yurtimiz aholisining 19 milliondan ortig‘ini 30 yoshgacha bo‘lgan yoshlar tashkil qilmoqda. Har yili o‘rtacha 600 ming yoshlar mehnat bozoriga kirib kelyapti. Yaqin o‘n yilda bu raqam bir millionga yetishi kutilmoqda.

Shu bois, mamlakatimizda yoshlarga oid davlat siyosati sohasida keng ko‘lamli ishlar amalga oshirilmoqda. O‘tgan vaqt ichida yoshlarni har tomonlama qo‘llab-quvvatlash, ularning huquq va qonuniy manfaatlarini himoya qilish, mamlakatimiz istiqboli uchun mas’uliyatni o‘z zimmasiga olishga qodir, tashabbuskor, shijoatli yoshlarni tarbiyalash borasida alohida tizim yaratildi.

Jumladan, 30 iyun sanasi mamlakatimizda “Yoshlar kuni”, deb e’lon qilindi. Yoshlar siyosatini amalga oshiruvchi alohida tashkilot tashkil etilib, yoshlarning davlat boshqaruvi va jamiyat taraqqiyotining barcha bosqichida to‘laqonli ishtirokini ta’minlashga qartilgan bir qator chora-tadbirlar amalga oshirildi.

Xususan, parlamentimizning har ikkala palatasi qoshida tashabbuskor yoshlarni o‘zida jamlagan “yoshlar parlamenti” faoliyati yo‘lga qo‘yildi. Turli sohalarda samarali faoliyat yuritayotgan, yuqori natijalarga erishib, tengdoshlariga o‘rnak bo‘layotgan yigit-qizlarni rag‘batlantirish maqsadida “Mard o‘g‘lon” davlat mukofoti va “Kelajak bunyodkori” medali ta’sis etildi.

Shu bilan birga, yoshlarga sifatli ta’lim berish, kasb-hunarga o‘qitish va bandligini ta’minlashga alohida e’tibor qaratilmoqda. Har bir tuman va shahar hokimliklarida yoshlar bilan ishlashga bevosita mas’ul bo‘lgan hokim o‘rinbosari lavozimi joriy qilindi. Bu ishlarni mahallada tashkil etish bo‘yicha vertikal boshqaruv tizimi yaratildi. Natijada, 9 ming 500 ta mahallaga fidoyi va tashabbuskor yoshlar yetakchilari tayinlandi. Bu tizim orqali yoshlarga 100 dan ortiq imkoniyatlar yaratilib, ularni manzilli qo‘llab-quvvatlash yo‘lga qo‘yildi. Shuningdek, alohida e’tibor va ko‘makka muhtoj yoshlar bilan manzilli ishlash maqsadida “Yoshlar daftari” va jamg‘armasi tashkil etildi.

Iqtidorli yoshlarning eng yaxshi g‘oya, startap va loyihalariga qulay va yengil shartlarda, zarur bo‘lsa foizsiz kreditlar ajratilmoqda. IT-parklar bo‘yicha tajribadan kelib chiqib, hududlarda “Kreativ park”lar ham tashkil etilib, ularga ham IT-park rezidentlariga berilgan imtiyoz va yengilliklar qo‘llanilmoqda.

Jumladan, 2022 yilning o‘zida yoshlar tadbirkorligi uchun 4 trillion so‘m kredit ajratilib, 150 mingta loyiha ishga tushirilib, 325 mingta yangi ish o‘rinlari yaratildi. Qishloq xo‘jaligi sohasiga qiziqqan, yer bilan tillashib o‘z daromadini oshirish ishtiyoqida bo‘lgan yoshlar uchun 43 ming gektar ekin maydoni ajratilib, 435 ming yoshlar bandligi ta’minlandi. Shu bilan birga, 32 mingdan ziyod yoshlarga subsidiya orqali o‘z qiziqishlaridan kelib chiqqan holda asbob-uskuna, mehnat qurollari va kompyuter jamlanmalari olib berildi.

Bu sohadagi ishlarni yanada aniq va manzilli tashkil etish maqsadida 14 yoshdan 30 yoshgacha bo‘lgan 9 million nafar o‘g‘il-qiz alohida e’tiborga olindi. Shuningdek, ilk bor 25 ta vazirlik va idora ma’lumotlari o‘zaro uyg‘unlashgan elektron bazaga jamlandi. Barcha yoshlarning ijtimoiy ahvoli, qobiliyati va qiziqishlari o‘rganilib, “mahalladan vazirlikkacha” tizimida ishlash yo‘lga qo‘yildi.

Umuman olganda, bugun yoshlar bilan ishlash barcha rahbarlarning, keng jamoatchilikning, butun jamiyatimizning va parlament a’zolarining eng ustuvor vazifasiga aylandi. Natijada, mamlakatimiz yoshlarining o‘ziga va kelajagiga bo‘lgan ishonchi ortib, xalqaro maydonlarda har bir soha va yo‘nalishlarda munosib o‘rinlarni egallab yurtimiz dovrug‘ini dunyoga yoymoqda.

Maxfirat XUSHVAQTOVA,

Oliy Majlis Qonunchilik palatasi deputati