Iqtisodiyot — mamlakat taraqqiyotining tayanchi

Fevral oyining dastlabki haftasi viloyatimiz ijtimoiy-siyosiy hayotida muhim ahamiyatga ega boʻlgan voqea bilan boshlandi. Namanganga hududdagi ijtimoiy-iqtisodiy islohotlarning qanday borayotganligi bilan tanishish, aholi bilan muloqot qilish, yurt taraqqiyotida muhim yangi marralarni egallash uchun mavjud imkoniyatlarni ishga solish haqida fikrlashish maqsadida mamlakat Prezidenti Shavkat Mirziyoyev tashrif buyurdi. Joylarda oʻtkazilgan uchrashuvlarda Oʻzbekistonni dunyodagi rivojlangan davlatlar qatoriga olib chiqish uchun nimalar qilish zarurligi muhokama qilindi. Tadbirkorlikni yanada rivojlantirish, odamlar turmush farovonligini oshirish, aholining maʼnaviy-maʼrifiy darajasini oshirish kabi masalalar diqqat markazida boʻldi.

Viloyatimizdagi salkam qirq ming kishini tashkil etadigan “adolat”chilar ham tashrifni zoʻr diqqat-eʼtibor bilan kuzatib turdilar. Prezidentimizning oldimizga qoʻygan vazifalarni bajarish uchun kurashda oʻzimizni kamarbasta deb his etdik. Tashrifdan soʻng faollarimiz bilan muloqotlarda ular Yurtboshimizning har bir soʻzidan nihoyatda taʼsirlanganliklarini, yanada yuksak sifat va unumdorlik bilan mehnat qilishga ahd etganliklarini bildirmoqdalar. Ayni paytda mahalla fuqarolar yigʻinlarida, mehnat jamoalarida, tashkilot va muassasalarda tashrif yakunlari, unda koʻtarilgan masalalarning mazmun-mohiyati haqida suhbatlar tashkil etilmoqda. Shu jarayonda aholining Davlatimiz rahbari olib borayotgan ichki va tashqi siyosatni qizgʻin maʼqullayotganligi koʻzga tashlanmoqda.

Maʼlumki, taraqqiyotni taʼminlashda iqtisodiyotning oʻrni alohida. Shuning uchun viloyatimizda ishlab chiqarishni yanada rivojlantirish, tadbirkorlik harakatini kengaytirishga alohida eʼtibor berilmoqda. Buni Prezidentimiz “Barkamol avlod” kichik sanoat zonasida boʻlganida yana bir bor taʼkidladi.

- Soʻnggi besh yilda Namanganda sanoat, xizmatlar va tadbirkorlikning boshqa sohalarida “katta sakrash” boʻldi, bu bor gap. Masalan, viloyatda korxonalar soni 15 mingtaga koʻpayib, 32,5 mingtaga yetdi. Bu davrda xususiy biznes ishlab chiqargan mahsulotlar hajmi 1,6 baravar oshib, 8,3 trillion soʻmga yetdi. Bu – Respublika boʻyicha eng yuqori oʻsish surʼatlari, degani, — dedi Shavkat Mirziyoyev.

Shu oʻrinda kichik sanoat zonalari bugungi kunda viloyat iqtisodiyotini rivojlantirishning muhim vositasiga aylanganligini qayd etish lozim. Hozirgacha shahar va tumanlarda yetmishdan ortiq KSZ tashkil etilgan. Ularning tadbirkorlik harakatini keng quloch yoydirishdagi oʻrni beqiyos boʻlmoqda. Shu bilan birga bozorni toʻldiradigan koʻplab turdagi xaridorgir mahsulotlarni ishlab chiqarish yoʻlga qoʻyilmoqda. Amalga oshirilayotgan istiqbolli loyihalar aholi bandligini taʼminlash kabi ijtimoiy masalani hal etishga ham katta hissa qoʻshmoqda. Bu boradagi ishlar Yurtboshimiz tomonidan maʼqullangani namanganliklarning ruhini yanada koʻtarib, mehnat qilishdagi gʻayratini joʻsh urdirib yubordi.

Isroiljon JOʻRAYEV,
“Adolat” SDP Namangan viloyat Kengashi raisi.