Ishlar sifatli va o‘z vaqtida ko‘riladi

Oliy Majlis Qonunchilik palatasidagi “Adolat” SDP fraksiyasi yig‘ilishida partiya maqsad va vazifalaridan kelib chiqib davlat va jamiyat qurilishining muhim sohalari, fuqarolarning qonuniy manfaatlarini ta’minlovchi, sud-huquq sohasiga qaratilgan qator qonun loyihalari ko‘rib chiqildi.

Dastlab deputatlar “Sud qarorlarining qonuniyligi, asosliligi va adolatliligini tekshirish instituti takomillashtirilishi munosabati bilan O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida”gi qonun loyihasini muhokama qildilar.

Ta’kidlanganidek, keyingi yillarda mamlakatimizda sud hokimiyatining chinakam mustaqilligini ta’minlash, adolatli sud qarorlari qabul qilinishiga erishish orqali xalqning, shu jumladan, tadbirkorlarning sud tizimiga bo‘lgan ishonchini mustahkamlash, har bir shaxs sud va sudyalar siymosida o‘zining ishonchli himoyachisini ko‘rishiga erishish, sudlar faoliyatini to‘liq raqamlashtirish borasida keng qamrovli ishlar amalga oshirilmoqda.

Sud-huquq sohasidagi islohotlar, eng avvalo, sudlarni mustaqil qilishga qaratilib, bu borada tizimdagi ayrim byurokratik to‘siqlar bartaraf etilyapti, huquq va manfaatlarning ishonchli himoyasi kuchaytirilyapti. Oxirgi olti yilda amalga oshirilgan islohotlar sudlar faoliyatida ochiqlik va shaffoflikni ta’minlash bilan birga, fuqarolarning huquq hamda qonuniy manfaatlarini himoya qilishga xizmat qilmoqda.

“Adolat” SDP ham sud tizimini kompleks rivojlantirish, sudlarning mavqeini oshirish, sudyalarning daxlsizligini ta’minlash adolatli jamiyat qurishning muhim sharti, deb hisoblaydi. Partiya sud hokimiyati mustaqil, sudlar esa adolat qo‘rg‘onlari bo‘lishi tarafdori.

Mazkur qonun loyihasida sud qarorlarini shikoyat (protest) asosida apellyatsiya tartibida, agar ular apellyatsiya tartibida ko‘rilmagan bo‘lsa kassatsiya tartibida, apellyatsiya yoki kassatsiya tartibida ko‘rilgan sud qarorlarini taftish tartibida ko‘rish, apellyatsiya shikoyatini berish muddati 20 kundan 10 kunga qisqartirish belgilanmoqda.

Fraksiya a’zolari ushbu qonunning partiya maqsad va g‘oyalari bilan uzviy bog‘liq holda ishlab chiqilgani, uning qabul qilinishi esa sudlarning mas’uliyatini oshirib, ishlarning sifatli va o‘z vaqtida ko‘rilishiga, fuqarolarning shikoyat qilishga bo‘lgan huquqlari doirasi kengayishi hamda ularning e’tirozi va sarsongarchiligining oldini olishga erishiladi.

Muhokamalar davomida deputatlar qonun loyihasining muhimligini e’tiborga olib uni yanada takomillashtirish, pishiq-puxta holatga keltirish bo‘yicha bir qator takliflar berishdi.

Qizg‘in baxs-munozalardan so‘ng, qonun loyihasi deputatlar tomonidan ma’qullandi.