Istiqlol bilan nurli manzillar sari

Istiqlolga erishganimizga ham mana roppa-rosa 32 yil toʻldi. Men bir partiya faoli sifatida oʻtgan davr mobaynida respublikamiz shahar va qishloqlarida keng koʻlamli ishlar amalga oshirilganini alohida mamnuniyat bilan qayd etmoqchiman. Eng asosiysi, esa xalqimizning ong-u shuurida, tafakkurida oʻzgarish boʻldi. Odamlar bugun barcha jabhada kechayotgan islohotlarga befarq emas.

Shu kecha-kunduzda birgina Qashqadaryo viloyatida umumiy qiymati 300 million AQSH dollaridan ortiq 30 ga yaqin yirik ishlab chiqarish obyekti va quvvatini ishga tushirish boasida keng koʻlamli ishlar olib borilyapti. Shunday yirik loyihalardan biri qiymati qariyb 74,1 million dollarni tashkil etadigan Gʻuzor tumanidagi Janubiy Tandircha konida siquv kompressor stansiyasi qurib foydalanishga topshiriladi. Energetika jabhasida ham Gʻuzor va Amir Temur podstansiyalari oraligʻidagi 220 kilovoltlik havo elektr uzatish tarmogʻini barpo etilishini yakunlash ustida ishlar olib borilyapti. Umuman, joriy yilda viloyatimizda sport poyabzallaridan tortib ipak momigʻigacha ishlab chiqarish yoʻlga qoʻyiladi. Iqtisodiyotning turli sohalarida yirik ishlab chiqarish obyektlarining ishga tushirilishi viloyatimizning sanoat va eksport salohiyatini yuksaltirish barobarida aholining doimiy ish bilan bandligi darajasi va turmush farovonligiga ham xizmat qiladi. Zero, Qashqadaryoda amaldagi yilda ushbu korxona va qoʻshimcha quvvatlarning foydalanishga topshirilishi evaziga 2 ming 700 ta doimiy ish oʻrni vujudga keladi. Vohamizning barcha goʻshalarida amalga oshirilayotgan yaratuvchilik, bunyodkorlik ishlari har bir kun bu kelajak uchun poydevor shiori ostida uyushtirilyapti. Istiqlol fidoyi xalqimiz uchun oʻz taqdirining haqiqiy egasi boʻlib, qadr-qimmatini anglab, munosib hayot kechirish, yurtimizda huquqiy demokratik davlat va fuqarolik jamiyatini barpo etish imkoniyatini yaratdi.Shu bilan birgalikda mustaqillik yillarida koʻhna tariximiz, boy merosimiz, milliy davlatchiligimiz, muqaddas dinimiz, urf-odat va anʼanalarimiz qayta tiklandi. Endilikda saxovat, muruvvat, mehr-oqibat, bagʻrikenglik hamjihatlik kabi olijanob fazilatlar, milliy va umumbashariy qadriyatlarga hurmat, Vatan taqdiri va kelajagiga daxldorlik tuygʻusi yuragimizning tub-tubidan oʻrin oldi, desak mubolagʻa boʻlmaydi.Davlatimiz rahbari tomonidan “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni yuqori saviyada oʻtkazish toʻgʻrisida”gi qarorni imzolanishi xalqimizning koʻnglini togʻdek koʻtardi.

Darhaqiqat, istiqlol tufayli oʻzbek xalqi oʻzligini angladi, ozod xalq, mustaqil davlat sifatida Oʻzbekistonning bor boʻy-bastini, ulkan salohiyatini butun dunyoga namoyon qilish imkoni ochildi. Ozodlik bois bizni butun dunyo tanidi, tan oldi, xalqimizning fidokorona mehnati, yoshlarimizning gʻayrati, azm-u shijoati ila vatanimizning shon-shuhrati olam uzra yanada kengroq yoyilmoqda. Allohga shukrlar boʻlsinki, hurriyat bergan beqiyos imkoniyatlar negizida ertangi kunimiz — erkin va farovon kelajagimizni oʻz qoʻlimiz bilan bunyod etmoqdamiz.  

Shuni unutmaslik kerakki, har bir inson baxtli boʻlishi uchun erkin boʻlishi, erkin boʻlishi uchun esa mustaqil boʻlishi lozim. Demak, biz, ziyolilar eng avvalo, mustaqillikning mazmun-mohiyatini anglab olishimiz va yosh avlodga uning ahamiyatini yetkazishimiz zarur boʻladi.

 Bugun har bir keksayu yosh “mustaqillik” deganda oʻz taqdiriga oʻzi egalik qilish huquqi ekanligini anglashi va uni yanada mustahkamlashga intilishi zarurligini tushunish lozim. Shuning uchun ham har bir inson “mustaqillik” degan soʻzning tub maʼnosini anglab tushunib yetishi, bu soʻzning buyuk neʼmat ekanligini qalbdan his qilishi va unda naqadar ulugʻ maʼno yotganligini anglashi ahamiyatlidir.

 Bu yil vohamiz ahli davlatimiz mustaqilligining 32 yilligini “Yangi hayot uchun, Yangi Oʻzbekiston uchun” degan bosh gʻoya asosida keng nishonlashga tayyorgarlik koʻrmoqda. Bu   jonajon Vatanimizda inson qadr-qimmatining, shaʼni-gʻururining nechogʻlik ustun qoʻyilganligidan, yurtimizda tinchlik va barqarorlikka erishilganligidan, davlatimiz sarhadlarining daxlsizligi taʼminlanganligidan hamda millatlararo totuvlik va diniy bagʻrikenglikning mustahkamlanganligidan darak berishini unutmasligimiz darkor.

 Ayni paytda viloyatimizda Mustaqillik bayramiga bagʻishlangan maʼnaviy-maʼrifiy anjumanlar, “uch avlod uchrashuvi” tadbirlari, ochiq muloqot va suhbatlar, adabiy-badiiy kechalar, milliy kino kunlari, gastronomik festivallar, sayillar, madaniyat va sport tadbirlari boshlab yuborildi. Ularda atoqli ilm-fan namoyandalari, madaniyat va sanʼat arboblari, taniqli sportchilar ishtirok etayotgani ayni muddao boʻlayotir.Partiyamiz faollari va deputatlar jamoat tashkilotlaridan iborat tuzilgan targʻibot guruhlari muntazam ravishda yangilangan Konstitutsiyamiz mazmun-mohiyati va “Oʻzbekiston—2030” strategiyasining asosiy ustuvor yoʻnalishlari doirasida belgilangan tub islohotlar haqida mahallalar, taʼlim va mehnat jamoalarida maʼrifiy uchrashuv va suhbatlar oʻtkazib kelyapmiz.

Shubhasiz, joriy yilda ham butun xalqimiz bilan mamlakatimiz mustaqilligining 32 yillik bayramini zoʻr koʻtarinkilik va mehnatda yangi-yangi yutuqlarni qoʻlga kiritgan holda nishonlaymiz. Mustaqilligimizga aslo koʻz tegmasin.

Mustaqilligimiz abadiy boʻlsin! Xalqimiz omon boʻlsin!

                              Ulugʻbek Ashirov,

Oʻzbekiston “Adolat” SDP viloyat Kengashi faoli,

Qashqadaryo viloyati “Qatagʻon qurbonlari xotirasi” muzeyi ilmiy xodimi.