Jamiyat taraqqiyotida siyosiy partiyalarning oʻrni

“Adolat” sotsial demokratik partiyasi Jizzax viloyat Kengashi tomonidan “Jamiyatda yuksak huquqiy madaniyatni shakllantirishda siyosiy partiyalarning oʻrni” mavzusida davra suhbati tashkil etildi.

Tadbirda partiyaning viloyat, shahar va tuman Kengashi xodimlari, deputatlar, partiya faollari hamda OAV vakillari ishtirok etishdi.

Tadbirni ochib berish uchun soʻzga chiqqan partiyaning viloyat Kengashi raisi oʻrinbosari Poʻlat Hamzayev oʻrni va ahamiyati jihatidan siyosiy partiyalar jamiyat hayotida muhim rol oʻynashi, ular jamiyatni harakatga keltiruvchi asosiy siyosiy kuchlardan biri ekanligini aytib oʻtdi. Qolaversa, ular mamlakatni mafkuralar va fikrlarning xilma-xilligi asosida rivojlantirish hamda demokratiyani taʼminlashda favqulodda muhim rol oʻynaydigan jamoat birlashmasi ekanligini taʼkidlab oʻtdi. Shu maʼnoda, har bir partiya oʻziga boʻlgan ishonchni, kuch-quvvatni xalq ichidan oladi. Shuning uchun ham har qaysi partiya – xalqning maʼlum qatlami manfaatlarini ifodalovchi siyosiy kuch, desak, ayni haqiqat boʻladi.

Haqiqatdan ham, partiyalar fuqarolarning siyosiy hayotida, davlat boshqaruvida ishtirokini taʼminlash, demokratik davlatda davlat hokimiyatining birdan bir manbai boʻlmish – xalqni siyosiy irodasini ifodalashning muhim vositasidir. Siyosiy partiyalar koʻp hollarda hokimiyatning ijro etuvchi va qonun chiqaruvchi tarmoqlari oʻrtasida bogʻlovchi boʻgʻin vazifasini oʻtab, mazkur davlat hokimiyati organlarining mamlakat ichki va tashqi siyosati boʻyicha harakatlar dasturini belgilab olishda ham samarali taʼsir koʻrsatishi mumkin.

Qolaversa, tadbirda soʻzga chiqqanlar tomonidan siyosiy partiyalar oʻz deputatlari orqali joylardagi ijtimoiy-iqtisodiy muammolarni oʻrganishi, ularning yechimi boʻyicha takliflar berishi, ayniqsa, taʼsirchan parlament va jamoatchilik nazoratini olib borishi muhimligi qayd etildi. Partiyalar oʻz elektorati, ayniqsa, yoshlar, xotin-qizlar va nuroniylar bilan ishlash, ularning hayotiy muhim manfaatlarini taʼminlashga koʻmaklashishi zarurligi haqida yakdil fikr bildirildi. Har bir partiya oʻz dasturiy maqsadlarini parlamentga faol olib chiqishi, oʻz fraksiyalari orqali qonunchilik tashabbuslarini ilgari surishi va qonunlar ijrosini taʼminlashni nazoratiga olishi zarurligi haqida fikr almashishdi.

Tadbir ishtirokchilari bilan muloqot jarayonida siyosiy partiyalar faoliyati bugungi zamon talablaridan kelib chiqqan holda, chuqur tahlil qilinib, ularning ishini takomillashtirish va samarasini oshirish boʻyicha fikr-mulohazalar, amaliy takliflar bildirildi.

“Adolat” SDP Jizzax viloyat Kengashi Matbuot xizmati.