Joylardagi muammolar deputatlar tomonidan oʻrganilmoqda

Bugungi kunda joylarda aholini yillar davomida oʻylantirib kelayotgan aksariyat muammolar deputatlar saʼy-harakati, koʻmagi bilan oʻz yechimini topmoqda. Bu kabi amaliy ishlar ortiqcha ovoragarchiliklarning oldini olib, fuqarolarning hayotdan rozi boʻlib yashashi uchun xizmat qilmoqda. Bu borada partiyaning Surxondaryo viloyati Kengashi deputatlari va faollarining ham xizmatlari katta boʻlyapti.

Xususan, partiyaning Surxondaryo viloyat Kengashida saylovchilar bilan yakkama-yakka muloqot oʻrnatish maqsadida partiya faollari hamda deputatlaridan iborat ishchi guruhlari tuzilib, mazkur ishchi guruhlari tomonidan joylardagi MFYlar, ularning hududida joylashgan yuridik va jismoniy shaxslar bilan bevosita suhbatlar uyushtirilib, qonunlar ijrosi va islohotlarning amal qilish darajasi oʻrganilib borilyapti.

Jumladan, Angor tumanida saylovchilar bilan yakkama-yakka muloqotlar davomida tumanidagi “Chinobod” MFYda yashovchi fuqarolar G.Berdiyeva, T.Mamatova, Sh.Rahmonqulov, T.Allanazoralar mahalladagi yaroqsiz boʻlib qolgan simyogʻochlarni yangisiga almashtirish masalasida murojaat qilishdi. Ushbu masalani deputatlar tegishli tashkilot mutasaddilari bilan oʻrganishdi va tuman “Elektr tarmoqlari” unitar korxonasi vakillari hamda mahalla faollari birgalikda masʼul shaxs tayinlandi hamda simyogʻochlarni yangilash belgilandi. Ushbu masalani doimiy nazorat qilib borish tuman Kengashi deputati Yusuf Halimov va mahalla fuqarolar yigʻini raisiga yuklatildi.

Shuningdek, ishchi guruhiga Sariosiyo tumanidagi “Sharq yulduzi” MFY hududida istiqomat qiluvchi bir guruh fuqarolar mahalladagi ichki yoʻllarni taʼmirlash, mahallani ichimlik suvi bilan taʼminlash toʻgʻrisida murojaat qilishib amaliy yordam soʻrashdi. Mazkur muammo yuzasidan Xalq deputatlari Sariosiyo tuman Kengashi deputati Q.Nasriddinov tuman “Yoʻlqurilish” korxonasi rahbariga deputatlik soʻrovi yubordi va muammoni oʻz nazoratiga oldi. Shuningdek, mahallaga ichimlik suvi keltirish boʻyicha ham tuman “Suvoqova” unitar korxonasi rahbariyati bilan hamkorlikda muammoni hal qilib berish bildirildi.

Qolaversa, mazkur ishchi guruhi tomonidan Termiz tumani “Yangi hayot” MFYdagi fuqarolar bilan bevosita suhbatlar uyushtirilganda, mazkur mahallada istiqomat qiluvchi fuqarolardan biri Farhod Omonov farzandining taʼlim shartnomasi pulini toʻlash uchun kredit olishda muammolarga duch kelayotganligini aytib yordam soʻradi. Ishchi guruh tomonidan tuman hokimligi mutasaddilari bilan birgalikda fuqaro F.Omonovga kredit olish uchun amaliy yordam berishga kelishildi.

Shuningdek, Qiziriq tuman “Gulobod” MFYda istiqomat qiluvchi fuqarolar X.Qoʻchqorova, M.Normoʻminov, E.Omonovalar mahalladagi elektr yogʻoch ustunlarni, beton ustunlarga almashtirishda amaliy yordam berishlarini soʻrab, murojaat bilan chiqdi. Murojaat deputatlar tomonidan oʻrganilib tuman Elektr tarmoqlari korxonasi rahbariyatiga deputatlik soʻrovi yuborildi. Ushbu muammoni nazorat qilishni deputat I.Tojiyev oʻz nazoratiga olishini bildirdi.

Deputatlar oʻrganishlari davom etadi.

Dilafroʻz Rahmatova,
Oʻzbekiston “Adolat” SDP Surxondaryo viloyat Kengashi
bosh mutaxassisi