Karantin tugamaganini nega unutdik?

Bugun yer sharida hukm surayotgan koronavirus degan koʼrinmas yov dunyo xalqlarini katta tashvishga solib, hatto dunyoning eng taraqqiy etgan mamlakatlari ham bu ofat oldida esankirab qolishdi.

Jonajon vatanimiz - Oʼzbekistonda Prezidentimiz Sh.M.Mirziyoev rahbarliklarida xalqimizni ushbu kasallikdan, uning ayanchli oqibatlaridan imkon qadar kam talofot bilan olib chiqish boʼyicha qatʼiy choralar amalga oshirilmoqda, bu borada 20dan ortiq meʼyoriy hujjatlar qabul qilindi.

Hammamizga maʼlumki, bir necha oy davom etgan karantin cheklovlaridan keyin mamlakatimizda iqtisodiy va ijtimoiy sohalarning barqaror ishlashini taʼminlash, aholining yashash sharoitlarini yaxshilash maqsadida karantin cheklovlari yumshatildi. Endilikda ushbu jarayon tobora keng qamrovli boʼlib boraveradi. Аlbatta bu aholining kayfiyati, talab va istaklari, davlat va jamiyat hayotining turli sohalari rivojini inobatga olgan holda joriy etildi.

Koʼrilgan karantin choralari va puxta olib borilgan tibbiy chora-tadbirlar sababli ahvol birmuncha yaxshilanganligini eʼtirof etgan holda koronavirus pandemiyasi hali chekingan emasligini taʼkidlamoqchiman.

Koronavirus pandemiyasining yana tarqab ketmasligi uchun har birimiz ongli ravishda masʼul ekanligimizni unutmaylik, har birimizning hayotimiz va salomatligimizga oʼzimiz javobgarmiz, aslida.

Sanitariya-gigiena qoidalariga qatʼiy amal qilgan holda, farzandlarimiz, ota-onalarimiz va keksa yoshdagi aholining sogʼliklarini oʼylab, sayohat, mehmondorchilik va boshqa rejalarimizni biroz keyinroqqa qoldiraylik. Tibbiy niqoblarni olib tashlashga va qoʼl berib salomlashishga biroz shoshilmaylik. Xalqimizga xos boʼlgan qadimiy urf-odatlarimizdan qoʼlimizni koʼksimizga qoʼyib salomlashishni kanda qilmaylik.

Marhabo PАRDАEVА,

Xalq deputatlari viloyati Kengashi deputati