Keksalar oʻgiti-ibrat maktabi

“Adolat” SDP Sherobod tuman “Ayollar qanoti” Kengashi tomonidan tuman Axborot-kutubxona markazida “Keksalar haftaligi” munosabati bilan “Keksalar ibrat maktabining fidoyilari” mavzusida tadbir boʻlib oʻtdi. Tadbirda uzoq yillar faoliyat yuritgan, hozirgi kunda keksalik nafaqasida boʻlishiga qaramasdan, yoshlarga oʻzining tajribasi, ishi bilan oʻrnak boʻlayotgan nuroniylar taklif etildi.

Soʻzga chiqqanlar elimiz rivojiga munosib hissa qoʻshib kelayotgan soha faxriylari va fidoyilarining mehnatlarini alohida eʼtirof etishdi. Bundan tashqari, keksa avlod vakillari bilan bu kabi uchrashuvlarning oʻtkazilishida katta maʼno mujassamligi tilga olindi.

Tadbirda soʻz olganlar Nodirabegim, Uvaysiy, Dilshoda Barno kabi mumtoz adabiyotimiz namoyondalari, Zulfiya Isroilova, Saida Zunnunova hamda Surxon vohasidan yetishib chiqqan Jamila Ergasheva, Mavluda Qobilova, Raʼno Uzoqova, Gulandon Togʻayeva kabi maʼrifatparvar ayollarimiz faoliyati xususida ham fikr-mulohazalar bildirib oʻtishdi.

 Ozoda Joʻrayeva “Guliston” MFY xotin-qizlar faoli, tadbir ishtirokchisi:

Tadbirda keksa avlod vakillari va yoshlar muloqoti davomida yurtimizda madaniyat va sanʼat sohasini rivojlantirish borasida amalga oshirilayotgan keng koʻlamli ishlar eʼtirof etildi. Albatta, bunday uchrashuvlarning tashkil qilinishi maʼnan yetuk yosh avlodni tarbiyalash, kelgusida ularning komil inson boʻlib yetishishida ulkan ahamiyat kasb etadi. Aytish joiz, butun hayoti va faoliyatini xalq dardi bilan bogʻlagan, xalq gʻamiga hamdard boʻlibgina qolmay, uning istiqboli uchun qaygʻurgan fidoyi maʼrifatparvar ayollarimizning hayot yoʻli chinakam ibrat maktabidir. Bugungi tadbir ham barchani tafakkur qilishga, yurt istiqboli yoʻlida masʼuliyatli boʻlishga undaydi.

Tadbirda faol ishtirok etgan ijodkor yoshlarga hamda tadbir tashkilotchilariga tashakkurnomalar topshirildi.

Manzura Ulugʻberdiyeva,

“Adolat” SDP Sherobod tuman “Ayollar qanoti” Kengashi faoli.