Koʻpchilikni oʻylantirib kelayotgan muammo deputat tomonidan oʻrganildi

Oliy Majlis qonunchilik palatasi deputati Abdugʻani Umirov Nishon tumanidagi Jalajin mahallasi saylovchilari bilan uchrashdi. Deputat mahalla ahli oʻrtasida Oliy Majlis Qonunchilik palatasi tomonidan ishlab chiqilayotgan yangi qonun loyihalari xususida atroflicha tushuncha berdi. Mahalla ahlini qiynab kelayotgan muammolarni oʻrganib, ularga yechim topib fuqarolar mushkulini oson qildi.

- Mahallamiz hududida kutubxona yoʻq,-dedi fuqaro Xolmoʻmin Omonov.- Shu masalada bizga amaliy yordam bersangiz nur ustiga aʼlo nur boʻlar edi.

Ushbu masalani obdon oʻrgangan deputat mahalla binosida kutubxona tashkil etish zarur degan xulosaga keldi va mahalla raisiga koʻrsatma berdi.

Shuningdek Jalajin MFY fuqarolari mahalla markazidagi chorrahada svetofor oʻrnatishda ham deputatdan koʻmak soʻrashdi. Deputat bu muammoni mahalla uchastka noziriga yukladi.

Aholi bilan yuzma-yuz muloqot davomida oilalarni gaz balonlari bilan vaqtida taʼminlanmayotgani, mahalla hududidan chiqindilar olib ketilmayotgani, qishloqlarda yovvoyi itlar koʻpayib ketganidan odamlar shikoyat qilishdi. Deputat Abdugʻani Umirov fuqarolarni qiynab kelayotgan kamchiliklarni oʻrganib, oʻz vaqtida bartaraf etish yuzasidan tuman gaz taʼminoti idorasi va tuman obodonlashtirish boʻlimi masʼullariga tegishli topshiriqlar berdi.

“Adolat” SDP fraksiyasi aʼzosi Abdugʻani Umirovning fuqarolar murojaatlarini tinglab, oʻz vaqtida hal etishga bosh qosh boʻlayotgani koʻpchilikni mamnun etmoqda.

                                                           “Adolat”SDP

Qashqadaryo viloyat  Kengashi Matbuot xizmati.