Konstitutsiya bilimdoni

“Adolat” sotsial-demokratik partiyasi tomonidan har yili anʼanaviy tarzda “Vatan kelajagi yoshlar qoʻlida” loyihasi doirasida “Konstitutsiya bilimdoni” koʻrik-tanlovi oʻtkazib kelinmoqda.

Karmana tuman Barkamol avlod bolalar maktabida tanlovning Karmana tuman bosqichi koʻtarinki ruhda boʻlib oʻtdi. Qizgʻin tus olgan bahslarda akademik litsey, kollej va texnikumlarda boʻlib oʻtgan tanlov gʻoliblari va ularning ustozlari, pedagoglar hamda ota-onalar ishtirok etdilar.

Bellashuvda ishtirokchilar oʻzini tanishtirish, Konstitutsiyaga doir bilimlarini aniqlash, erkin mavzu kabi shartlar boʻyicha bahs olib bordilar. Ayniqsa, qatnashchilarning Konstitutsiya moddalarini yoddan bilishligi, erkin mavzudagi chiqishlari bilan yigʻilganlarni hayratga katta taassurot qoldirdi.

Partiya faollari, pedagog va huquqshunoslardan iborat hakamlar tomonidan qatnashchilarning chiqishlari xolisona baholandi va uch nafar gʻoliblar aniqlandi. Ular darajalari boʻyicha diplom va tashkilotchilarning esdalik sovgʻalari bilan taqdirlandilar.

Mutlaq gʻoliblikni qoʻlga kiritgan Karmana tuman kasb-hunar maktabi talabasi Sabrina Jumayeva viloyat bosqichida ishtirok etish huquqiga ega boʻldi.

“Adolat” SDP Navoiy viloyat  Kengashi Matbuot xizmati.