Konstitutsiyada yoshlar huquq-manfaatlari yanada mustahkamlanmoqda

Oʻzbekiston “Adolat” SDP Markaziy apparati hamda partiyaning Toshkent viloyati Kengashi tashabbusi bilan Chirchiq davlat pedagogika universitetida “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasini qoʻllab-quvvatlash va referendumga munosib tayyorgarlik koʻrish, targʻibot-tashviqot ishlarini amalga oshirish maqsadida tadbir oʻtkazildi.
Tadbirda Oʻzbekiston “Adolat” SDP Siyosiy Kengashi raisi Bahrom Abduhalimov ishtirok etib, Konstitutsiyaviy qonun loyihasi yuzasidan oʻz fikr-mulohazalarini bildirdi.

— Yangilanayotgan Konstitutsiyamizda birgina yoshlarning huquq va erkinliklarining kafolatlanishi borasidagi normalar soni ikki baravarga oshmoqda. Xususan, unda kiritilayotgan konseptual oʻzgarishlar qatorida jamiyatning yarmidan koʻpini tashkil qiladigan yoshlarga munosib hayot sharoiti yaratish, barqaror iqtisodiyot, xavfsiz davlat, samarali boshqaruv, ijtimoiy kafolatlar yanada mustahkamlanmoqda. Bundan tashqari, yoshlarning taʼlim olishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish – davlatning konstitutsiyaviy majburiyati sifatida kiritilayotganligi yoshlar huquq-manfaatlari taʼminlanishida muhim ahamiyatga ega, — dedi partiya yetakchisi.


Tadbir ishtirokchilari ham bu borada oʻz fikrlarini, munosabatini bildirdi. Shuningdek, 30-aprel kuni oʻtkaziladigan referendumda faol ishtirok etish boʻyicha mulohazalar oʻrtaga tashlandi.