Konstitutsiyada yoshlarning jamiyat va davlat hayotida faol ishtiroki kafolatlandi

Yangi Oʻzbekiston Konstitutsiyasi davlat va jamiyat tayanchi, mamlakatimiz taraqqiyotining huquqiy kafolati, istiqlolimizning yorqin ramzi, koʻp millatli xalqimiz xohish irodasining qonuniy ifodasi hisoblanadi. Prezidentimizning   baxtimiz qomusini aholi oʻrtasida keng targʻib etish haqidagi farmoniga asosan bugun Oʻzbekiston “Adolat” SDP Qashqadaryo viloyat Kengashi tomonidan Qarshi shahridagi tibbiyot texnikumida “Konstitutsiya baxtimiz qomusi ertamiz kafolati” mavzusida tadbir boʻlib oʻtdi. Unda yoshlar, xotin-qizlar, deputatlar va keng jamoatchilik vakillari qatnashdi.

Tadbirda partiya faoli, xalq deputatlari Qarshi shahar Kengashidagi “Adolat” SDP deputatlik guruhi rahbari Husniddin Berdimurodov maʼruza qildi.

Yangi Konstitutsiyada yoshlar huquq erkinliklari himoyalanishi va ularning jamiyat hamda davlat hayotida faol ishtirokini ragʻbatlantirish kafolatlab qoʻyildi,-dedi Husniddin Berdimurodov.- Yoshlarda milliy va umuminsoniy qadriyatlarga sodiqlik, xalqning boy madaniy merosidan faxrlanish, vatanparvarlik tuygʻularini shakllanishiga gʻamxoʻrlik qilishi, ularning zamonaviy taʼlim olishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish – davlatning konstitutsiyaviy majburiyati sifatida kiritildi. Davlat shu orqali oʻz zimmasiga muhim majburiyatlarni oldiki, mazkur normalar, nafaqat yoshlar manfaati, balki butun jamiyatimiz va mamlakatimizning kelgusi taqdiri uchun muhimdir.

 Albatta, navqiron yosh avlod har bir davlatning kelajagini, salohiyatini belgilovchi muhim ijtimoiy qatlam sanaladi. Zero, har bir jamiyatning bugungi holati, taqdiri va istiqboli unda yashayotgan yoshlarning salmogʻi, maʼnaviyati va ongliligi darajasi bilan belgilanadi. Albatta, iqtidorli yoshlar   kelajagimiz, uning faol aʼzosi, taʼbir joiz boʻlsa jamiyat ertasining munosib vorislaridir. Mazkur nuqtai nazarga koʻra yoshlar davlat va jamiyat, qolaversa, Prezidentimiz tomonidan ham doimiy eʼtiborda ekan, yosh avlod tarbiyasida har birimiz masʼuliyatli yondashmogʻimiz lozim. Yoshlar xalqimiz bildirgan yuksak ishonchini toʻla oqlashi va unga munosib boʻlishi kerak.

Tadbirda baxtimiz Qomusida oʻz aksini topgan   boshqa moddalar xususida ham ishtirokchilarga keng tushuntirishlar berildi. Farzandlarimizning isteʼdod va qobiliyatini, ezgu intilishlarini toʻliq roʻyobga chiqarish, ijtimoiy faolligini oshirish, hayotda munosib oʻrin egallashlari uchun mamlakatimizda barcha imkoniyatlar yaratilayotgani batafsil tushuntirildi.Yoshlar oʻzlarini qiziqtirgan savollarga kerakli javob oldilar.

                                                                                              Akmal Hayitov,

                                                                                     Partiya faoli.