Konstitutsiyaviy islohotlarni oʻtkazish – davr talabi

Bugungi kunda yangilanib borayotgan mamlakatimizga hamohang tarzda Bosh Qomusimizga oʻzgartirish va qoʻshimchalar kiritish bilan bogʻliq islohotlar amalga oshirilmoqda. “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni loyihasi matni ishlab chiqilib keng jamoatchilikka eʼlon qilindi.

Mazkur jarayonda mamlakatimizning har bir hududida nuroniy, yoshlar, turli millat vakillari, taʼlim va tibbiyot sohalari xodimlari, tadbirkorlar, fuqarolik jamiyati institutlari vakillari, umuman, Yurtimiz taqdiriga befarq boʻlmagan fuqarolarimiz ishtirokida davra suhbatlari, turli yigʻilishlar oʻtkazilmoqda.

Bugun ham “Adolat” sotsial-demokratik partiyasi Jizzax viloyat Kengashi tomonidan ZOOM platformasi “online” va “ofline” formatda “Konstitutsiyaviy islohotlar mazmun-mohiyati” mavzusida seminar tashkil etildi.

Mazkur tadbirda partiyaning viloyat, shahar, tuman Kengashi xodimlari, partiyaning ayollar va yoshlar qanotlari faollari, deputatlar hamda OAV vakillari ishtirok etishdi.

Tadbirni soʻzga chiqqan partiyaning viloyat Kengashi raisi Orif Shukurov soʻngi yillarda mamlakatimizda inson huquq va erkinliklarini taʼminlash sohasida amalga oshirilayotgan islohotlar bu boradagi xalqaro standartlarni milliy qonunchiligimizga bosqichma-bosqich kiritgan holda izchil va tizimli ravishda amalga oshirib kelinayotganligini, bu esa oʻz navbatida Bosh qomusimizda ham oʻz aksini topayotganligini taʼkidlab oʻtdi.

Shuningdek, davra suhbatida soʻz olgan seminar ishtirokchilari tomonidan yangilanib borayotgan mamlakatimizga hamohang tarzda Asosiy qomusimizga ham oʻzgartirish va qoʻshimchalar kiritish, mamlakatimiz taraqqiyoti va xalqimizning farovon hayot kechirishi yoʻlida amalga oshirilayotgan chora-tadbirlarni yanada jadallashtirish bilan bogʻliq olib borilayotgan islohotlarda hech birmiz befarq boʻlmasdan, faollik koʻrsatib oʻz fikr-mulohazalarimizni bildirishimiz va shu orqali mamlakatimiz taraqqiyotining yangi bosqichiga qadam qoʻyishida hamda Yangi Oʻzbekistonni bunyod etishda oʻzimizning munosib hissamizni qoʻshishimiz lozimligi aytib oʻtildi.

“Adolat” SDP Jizzax viloyat Kengashi
matbuot xizmati