Korruptsiyaga qarshi kurashish jarayonida oshkoralik va shaffoflik muhim

08.07.2021 04:07:41

Dunyoda hech bir mamlakat korruptsiyadan holi emas. Biroq qaysi bir davlat korruptsiyaga qarshi kurashda qatʼiyat koʼrsatib qonunlarni mustahkamlasa, yaxshi natijalarga erishadi. Qaysidir davlatlar bu illatga qarshi samarali kurash olib borolmayotganligi uchun ham taraqqiyot va rivojlanishdan ortda qoladi.

Sir emas, soʼnggi paytlarda mamlakatimizda korruptsiyaga qarshi keskin kurash boshlandi va salmoqli natijalarga erishilyapti.

Davlatimiz rahbarining “Korruptsiyaga qarshi murosasiz munosabatda boʼlish muhitini yaratish, davlat va jamiyat boshqaruvida korruptsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʼgʼrisida”gi farmoni va “Korruptsiyaga qarshi kurashish faoliyatini samarali tashkil etishga doir qoʼshimcha chora-tadbirlar toʼgʼrisida”gi qarorining qabul qilinishi bu borada amaliy qadam boʼldi.

Bu hujjatlarda korruptsiyani oldini olishda ularning oqibatlari bilan emas, balki sabablarini oldini olish boʼyicha koʼrilayotgan choralar va davlat xizmatchilarining masʼuliyatini oshirish, umuman korruptsiyaga qarshi kurashish boʼyicha masʼuliyat hamda javobgarlikni kuchaytirish masalalari turibdi.

Oʼzbekiston Respublikasi Prezidentining korruptsiyaga qarshi kurashishga oid mazkur farmon va qarori tarixiy ahamiyatga ega, deb aytish mumkin boʼlgan siyosiy huquqiy hujjat hisoblanadi. Bundan koʼzda tutilgan asosiy maqsad korruptsiyaga qarshi murosasiz kurashga muhit yaratish, davlat va jamiyat boshqaruvida korruptsiyaviy omillarni keskin kamaytirishga qaratilgan.

Ushbu qaror va farmonning ishlab chiqilishida korruptsiyaga qarshi kurashda muvaffaqiyatlarga erishayotgan davlatlarning ijobiy tajribasidan foydalanilgan boʼlsa, ikkinchi tomondan milliy matbuotimiz, ijtimoiy tarmoqlarda fuqarolarimiz tomonidan faol muhokama qilingan korruptsiyaviy holatlar jiddiy tahlil qilinib, ularni bartaraf etish boʼyicha ishlab chiqilgan mexanizmlar ushbu hujjatlarda aks ettirilganligi quvonarlidir.

Mamlakatimizda har bir sohada korruptsiyaga qarshi kurashish standartlarida shaffoflik va oshkoralik mexanizmlari joriy etilmoqda. Oʼtgan yili korruptsiyaga qarshi kurashish boʼyicha ixtisoslashtirilgan agentlik tashkil etildi. Bu ham ushbu yoʼnalishdagi harakatlar ketma ketligining muhim belgisi hisoblanadi. Shu bilan birga hozirgi vaqtda meʼyoriy huquqiy bazani takomillashtirish va ularni amalga oshirish ustidan tizimli nazoratni oʼrnatish zarurligini davrning oʼzi taqozo qilmoqda.

Shuningdek, farmon boʼyicha 2021-2022 yillarga moʼljallangan korruptsiyaga qarshi kurashish boʼyicha Davlat Dasturi tasdiqlandi Mazkur dasturda bir qator qonun hujjatlari va tashkiliy huquqiy chora-tadbirlar koʼrsatib oʼtilgan.

Аytish joizki, mazkur farmon va qaror hamda bu boʼyicha ishlab chiqilgan dastur sohani tartibga solishda muhim qadam boʼldi, deb aytish mumkin.

Xulosa qilib aytganda, ushbu hujjatlarning amaliyotga joriy etilishi mamlakatimizda korruptsiyaga qarshi keskin kurash muhitini yaratish, davlat va jamiyat boshqaruvida korruptsiyaviy omillarni keskin kamaytirish va bu jarayonga keng jamoatchilikni jalb qilish hamda Oʼzbekistonni xalqaro nufuzli reytinglardagi oʼrnini yaxshilashga xizmat qilishi shubhasizdir.

 

Faxriddin ORIFXONOV,

Oʼzbekiston “Аdolat” SDP Surxondaryo viloyat Kengashi mafkuraviy ishlar boʼyicha rais oʼrinbosari

+