Mahallalarda o‘rganishlar olib borilyapti

O‘zbekiston “Adolat” SDP Surxondaryo viloyat Kengashi tomonidan tuzilgan ishchi guruhi Jarqo‘rg‘on tumanida bo‘lib tumandagi mahallalarda o‘rganishlar olib bordi. Xususan, ishchi guruh tumandagi “Porloq yulduzi” MFYda bo‘lib mavjud muammolar bilan tanishdi.

Aytish kerakki,mahallada aholi soni  2932 nafarni tashkil etadi. Shundan mehnatga layoqatli aholi soni 1129 nafarni tashkil etib,  doimiy va mavsumiy band bo‘lganlar soni 1069 nafar, ishsizlar soni esa 74 nafarni tashkil etayotganligi maʼlum bo‘ldi.  Joriy yilda mahallada to‘rtta YATT va bitta MCHJ tashkil etilgan. Mahallada yer va mulk solig‘i 335 million so‘m hisoblangan bo‘lib, tekshirishlar davomida shundan 35 foizigina bajarilgani maʼlum bo‘ldi. Ishsizlikni qisqartirish bo‘yicha mahallada hokim yordamchisi tomonidan  28 ta yangi ish o‘rinlari yaratilgan bo‘lsa joriy yil oktyabr oyida 15 ish o‘rniga mo‘ljallangan tikuvchilik sexi ochish rejalashtirilganligi aniqlandi. Shundan, 35 ish o‘rni  xo‘jalik yurituvchi subyektlar hisobida yaratish rejalashtirilganligi maʼlum qilindi. 

Ishchi guruhi tomonidan mahalla hududidagi  3-sonli umumtaʼlim maktabi ham o‘rganildi. Maktab 600 o‘ringa mo‘ljallangan bo‘lib, o‘rganishlarda maktabda sport zali mavjud bo‘lib, zal taʼmirtalab holatga kelib qolganligi , zalni kapital taʼmirlash 2019 yil Dasturga kiritilganligi va buning uchun davlat tomonidan 600 mln. mablag‘ ajratilganligi, ammo haligacha taʼmirlanmaganligi aniqlandi. Shuningdek,  maktabda faollar zali, oshxona ham mavjud emasligi, sinfxonalar yetishmasligi sababli maktabning qo‘shimcha binoga ehtiyoji borligi ham maʼlum bo‘ldi.  Mahalla hududida 150 o‘ringa mo‘ljallangan davlat maktabgacha taʼlim tashkiloti qurilish ishlari olib borilmoqda. Hozirgacha mahallada 7 ta oilaviy bog‘cha faoliyat olib boradi.

Shuningdek, ishchi guruhi tomonidan mahalladagi ichki yo‘llar ham o‘rganildi. O‘rganishlar asnosida mahalladagi  2 km ichki yo‘llar taʼmirtalabligi aniqlandi.

Yana shuningdek, ishchi guruhi tomonidan tumandagi “Mingchinor” MFY ham o‘rganildi. O‘rganishlarda mazkur mahalla binosi yo‘qligi, mahalla o‘z faoliyatini  “Porloq yulduz” MFY hududida joylashgan 2-sonli kasb-hunar maktabida olib borayotganligi maʼlum bo‘ldi. Mazkur mahallada ham ishsizlik muammosi mavjud bo‘lib ishsizlar soni 62 nafarni tashkil etyapti. Mahallada joriy yilda yer-mulk solig‘i 477 million so‘mni tashkil etib, shundan 37 foizi bajarilganligi aniqlandi.

Ishchi guruhi tomonidan mahalla hududida joylashgan 52-sonli umumtaʼlim maktabida o‘rganishlar olib borilganda maktab 120 o‘ringa mo‘ljallangan bo‘lib, yana 180 o‘ringa mo‘ljallangan qo‘shimcha yangi bino qurilishi tugallanib, sentyabr oyining boshida yangi maktab binosi topshirilishi rejalashtirilganligi maʼlum bo‘ldi. Lekin o‘rganishlarda maktabda bolalar sport maydoni, sport zali, faollar zali, oshxona mavjud emasligi aniqlandi. Yana shuningdek, maktabda toza ichimlik suvi yo‘qligi ham aniqlandi. Aniqlanishicha, mazkur mahallada maktab yoshidagi bolalar soni 631 nafarni tashkil etib, shundan 237 nafari hududdagi 52-umumtaʼlim  maktabga o‘qishligi, qolgan o‘quvchilar qo‘shni mahalla hududidagi 2 ta maktabda tahsil olishayotganligi maʼlum bo‘ldi. Shuningdek, mahallada 3 yoshdan 7 yoshgacha bo‘lgan bolalar soni 291 nafarni tashkil etsada, mahalla hududida davlat maktabgacha taʼlim tashkiloti mavjud emasligi aniqlandi.

Shuningdek, mazkur mahalladagi ichki yo‘llar ahvoli ko‘zdan kechirilganda hududdagi ichki yo‘llar 18 kilometrni tashkil etib, shundan 12 kilometr taʼmirtalabligi aniqlandi. Bundan tashqari toza ichimlik suvi bilan taʼminlanishda ham muammolar bor. Aniqlanishicha, mahalla hududida 30 foiz xonadonni  toza ichimlik suvi bilan taʼminlash zarur. 

– Ishchi guruhning vazifasi kamchiliklarni axtarish emas, balki hududlardagi muammolarni bartaraf qilishdir, – deydi partiya viloyat Kengashi raisi o‘rinbosari Isroil Qurbonov. – Chunki dasturlar ijrosini taʼminlashda ko‘zbo‘yamachiliklar bo‘lishi kerak emas. Ajratilgan mablag‘lar o‘z joyiga yetib borishi shart. Barcha shahar va tumanlarimizda ana shunday o‘rganishlar muntazam o‘tkazilib, aniqlangan kamchiliklar bartaraf etiladi. Qisqacha aytganda, har ikki qishloq aholisining turmush sharoiti yaxshilanib, farovon hayot kechirishlari uchun neki lozim bo‘lsa, barchasi taʼminlanadi.

Ammo ishlar yarim yo‘lda qolishi mumkin emas. Eng chekka hududlarda ham aholi ertaga emas, bugun yaxshi yashashga haqli. Davlat dasturlari ijrosi o‘z vaqtida va sifatli amalga oshirilishi kerak.

Ishchi guruh o‘rganishlari davom etmoqda.

Faxriddin Orifxonov,

O‘zbekiston “Adolat” SDP

Surxondaryo viloyat Kengashi mafkuraviy ishlar bo‘yicha rais