Maktablar kuz-qish mavsumiga tayyormi?

Havo sovib, yogʻingarchilik boshlandi. Bunday ob-havo sharoitida odamlarning salomatligi, oʻqish va mehnat samaradorligi koʻp jihatdan ish joylari, taʼlim va tibbiyot muassasalarining issiqlik bilan qay darajada taʼminlanganiga bogʻliq. Buxoro shahridagi ijtimoiy sohalarda kuz-qish mavsumiga tayyorgarlik ishlarini Oliy Majlis Senati aʼzosi Abira Huseynova va xalq deputatlari viloyat Kengashi deputati Gulchеxra Ravshanova Buxoro shahridagi 30-maktab va 12-maktabda boʻlib, amalga oshirilayotgan ishlar bilan tanishdilar.

Buxoro shahridagi 30-maktabda elevator xonasida Buxoro shahar maktabgacha va maktab taʼlimi boʻlimiga qarashli qurilish boʻlimi xodimlari tomonidan yangi elevator oʻrnatilayotganini,u yerdagi barcha truba va zadvijkalar almashtirilayotgani koʻrilib, ushbu maktabda kuz-qish mavsumiga tayyorgarlik ishlari talab darajasida, maktab toza-ozoda, tevarak-atrofi obodonlashtirilgan obod maskan ekanligiga guvoh boʻlishdi.

– Qish mavsumiga puxta tayyorgarlik koʻrish borasidagi chora-tadbirlar yanada kuchaytirilmoqda, – deydi maktab direktori. – Chunki qishning ayozli kunlarida sinf xonalarda moʻtadil haroratni yaratib, darslarning toʻliq oʻtilishiga erishish, eng muhimi, bolalarning sogʻligʻini asrash asosiy vazifadir.

Buxoro shahridagi 12-maktabda esa tashqi issiqlik tizimi almashtirilayotgani kuz-qish mavsumini betalofat oʻtkazilishi barqaror boʻlishi uchun zarur boʻlganligi, maktab elevatorida ham zaruriy ishlar olib borilayotgani bilan tanishildi va masʼul shaxslarga tegishli tavsiyalar berildi.

Muxtasar aytganda, mamlakatimiz taʼlim muassasalarida kuz-qish mavsumi oldidan olib borilayotgan keng koʻlamli yumushlar yosh avlodning zamon talablari asosida bilim olishi, hunar oʻrganishi, oʻz iqtidor va salohiyatini namoyon etishiga qaratilayotgan yuksak eʼtiborning yana bir ifodasidir.

Mohigul Rahimqulova,

“Adolat” SDP Buxoro viloyat Kengashi matbuot kotibi.