Muammoning katta kichigi boʻlmaydi

Davlatimiz rahbari tomonidan taʼlim tizimiga alohida eʼtibor qaratilishi bu borada jamoatchilik zimmasidagi masʼuliyatni ham oshirmoqda. Chunki maktab-kelajak ostonasi. Farzandlarimizning barkamol insonlar boʻlib kamolga yetishi ayni ilm maskanlari bilan bogʻliq.
Yuqoridagilardan kelib chiqib “Adolat” SDP Izboskan tuman kengashi faollari yangi oʻquv yili boshidan maktablarda yaratilgan sharoitlarni oʻrganishga kirishdi. Jamoatchilik nazorati tartibidagi tadbirlar taʼlim muassasalaridagi muammolar yechimiga yoʻl ochmoqda.
Tumandagi Taraqqiyot MFY hududida joylashgan 32-maktabda boʻlgan partiyadoshlarimiz yangi oʻquv yiliga qanday tayyorgarlik koʻrilgani, oʻquvchilarni darsliklar bilan taʼminlanganlik darajasi va kuz-qish mavsumiga tayyorgarlik ishlariga eʼtibor qaratdi. Maktabda olib borilayotgan ishlar koʻngildagidek. Yangi oʻquv yilini jamoa yangi nafas bilan boshladi. Buni sinf xonalaridagi qaynoq hayot ham koʻrsatib turibdi.
Bizni faqat maktabdagi bir muammo tashvishga soldi. Sovuq kunlarda 5 ta truba yorilib ketgan. Oradan shuncha vaqt oʻtdi. Biroq mutasaddilar tomonidan haligacha biron chora koʻrilmagan. Vaqt esa kutib turmaydi. Hademay yana sovuq kunlar boshlanadi. Koʻmir zaxirasi haqida ham hozirdan bosh qotirish lozim. Muammoning katta kichigi boʻlmaydi. Shunday ekan masʼullar masalaga jiddiy eʼtibor qaratishi zarur.

Dilfuza Ahmedova,
“Adolat” SDP Izboskan tuman kengashi raisi.