Muqobil energiya-eng toʻgʻri yoʻl

Oʻzbekiston Respublikasi Prezidenti Shavkat Mirziyoyev joylarda ijtimoiy-iqtisodiy islohotlarning borishi, amalga oshirilayotgan bunyodkorlik va obodonlashtirish ishlari, yirik loyihalar bilan tanishish, xalq bilan muloqot qilish maqsadida vodiy viloyatlariga tashrif buyurdi. Davlatimiz rahbari uchrashuvlar chogʻida mohiyat-eʼtibori bilan xalq farovonligi oshishi, iqtisodiyot mustahkamlanishiga xizmat qiladigan koʻplab koʻrsatmalar, topshiriqlar berdi. Tashrif mobaynida Prezidentimizning aholi talab ehtiyojini yaxshi bilishi, soha, tarmoqlarni yanada taraqqiy ettirish uchun qanday chora-tadbirlar amalga oshirilishi zarurligidan toʻla-toʻkis xabardorligi va tegishli topshiriqlar berib, ular bajarilishini talab qilishi yana bir bor yaqqol namoyon boʻldi.

Aholi soni, turli korxonalar borgan sari koʻpayayotgan sharoitda elektr energiyasiga boʻlgan talab kundan kunga ortmoqda. Bunda endi eng maqbul yoʻl – qayta tiklanuvchi energiya manbalaridan unumli foydalanish boʻlmoqda. Maʼlumotlarga koʻra, respublikada muqobil energiya ayniqsa, quyosh quvvatining yillik zaxirasi 270 million tonna shartli yonilgʻi ekvivalentiga tengligi isbotlandi. Bu real ehtiyojimizdan uch barobar koʻp ekan. Demak, imkoniyatlardan samarali foydalanish zaruriyati oshmoqda.
Prezidentimiz bilan boʻlib oʻtgan yigʻilishda muqobil yoʻsinda energiya ishlab chiqarish boʻyicha tegishli yoʻl-yoʻriqlar berildi, aniq vazifalar, choralar belgilandi. Ularning oʻz vaqtida, qay darajada sifatli bajarilishi biz partiya vakillarining saʼy-harakatiga ham bogʻliq. Zero, partiyamiz dasturiy maqsadlarida energiyaning mavjud barcha muqobil turlarini kompleks ravishda rivojlantirish orqali raqobatli energetika bozorini tashkil etishni ragʻbatlantirish, energiyani tejaydigan innovatsion texnologiyalarni joriy etish ham oʻrin olgan.
Shuningdek, energiya resurslariga tejamkor munosabatda boʻlish, energiyani tejovchi texnologiyalar va muqobil energiya manbalaridan foydalanishni aholi orasida targʻib qilish ham ustuvor vazifalarimizdandir. Binobarin, partiyamiz vakillari tashrif davomida bu yoʻnalishda berilgan topshiriqlar ijrosi yuzasidan oldimizga rejalarni belgilab, uni bajarishga kirishdik.
Muxtasar aytganda, partiyamiz vakillari kuch va imkoniyatlarini ishga solib, mamlakatimizda muqobil energetikani rivojlantirishga qaratilgan chora-tadbirlarni toʻla toʻkis qoʻllab-quvvatlaydi.

Nazokat Xidirova,
Xalq deputatlari Termiz shahar Kengashi deputati