Muzeylar qadriyatlar beshigi

1977-yilning 18 – may kuni Xalqaro muzeylar Kengashi tomonidan taʼsis etilgan kasb bayrami endilikda dunyoning bir yuz ellikdan ortiq davlatida keng nishonlanmoqda. Muzeylar ajdodlardan meros boʻlgan boylikni kelajak avlodga yetkazib beradigan ilmiy, maʼnaviy-maʼrifiy xazina. Yillar davomida boyib, toʻlib boraveradigan bu xazina faqatgina madaniy qadriyatlar namoyishigina boʻlib qolmay, uzoq tarix sahifalaridan soʻzlovchi bebaho kitob hamdir.

Oʻzbekistonning   mustaqillikka erishishi iqtisodiy va siyosiy hayotning barcha jabhalarida boʻlganidek madaniy sohada shu jumladan boy oʻtmish merosimizni oʻrganish saqlash va uni keng xalq ommasiga targʻib etish borasida ham tub burilish yasadi . Oʻzbekiston Respublikasi Prezidentining   “Muzeylar faoliyatini tubdan yaxshilash va takomillashtirish toʻgʻrisida”gi farmoni qabul qilinib, u muzey va muzey xodimlarining hayotida katta ahamiyat kasb etdi. Mamlakatimiz hududida mavjud boʻlgan muzeylar faoliyatini takomillashtirish, ularni xalqning maʼnaviy axloqiy kamolotida tutgan oʻrnini yanada oshirish maqsadida, Oʻzbek muzey jamgʻarmasi tuzildi. Bugungi kunda mamlakatimiz hududidagi turli muassasalar, korxonalar, qurilish tashkilotlari, qishloq jamoa boshqaruv xoʻjaliklari qoshida, shahar, tuman, viloyat markazlarida xalq taʼlimi tizimida muzeylar tashkil etilgan. Shu bilan birgalikda oʻnlab yozuvchilar, shoirlar, rassomlar, olimlar va mashhur sanʼat arboblarining uy muzeylari ham faoliyat koʻrsatmoqda. Muzeylar madaniy-maʼrifiy muassasa hisoblanib, uning vazifasi tarixiy hujjatlar, madaniy va maʼnaviy yodgorliklarni toʻplash, tabiiy boyliklardan namunalar jamlash va saqlash,ularni ilmiy jihatdan oʻrganib koʻrgazmalarga qoʻyish va keng xalq ommasiga havola qilishdan iboratdir. Muzeylar aholining oʻrtasida madaniy-maʼrifiy ishlarni olib boradi. Muzeylar faoliyati xalqning tarixiy taraqqiyot jarayonida rivojlanib borishi, qoʻlga kiritgan yutuqlari hamda qoldirgan boy madaniy-maʼnaviy merosi xususida juda katta bilimlar beradi.

Muzeylar madaniy-maʼrifiy muassasa sifatida ommaning ijtimoiy ehtiyojlarini qondirish ularni maʼnaviy kamolotga yetkazishning eng yetakchi vositalaridan hisoblanadi. Viloyatimizdagi   tarixi va madaniyati davlat muzeyi, qatagʻon qurbonlari muzeylarida oʻz ishining ustalari, tarixiy va zamonaviy bilimlarni egallagan bilimdon mutaxassislar faoliyat olib bormoqda. Bu esa xalqimizning oʻtmishga, tarix va madaniyat merosga boʻlgan hurmat va ehtiromini yanada oshirishga, moddiy va maʼnaviy boyliklarimizni koʻz qorachigʻidek asrashga daʼvat etuvchi yangi ijodiy imkoniyatlar eshiklarini ochib bermoqda.

Bugungi bayram munosabati bilan barcha fidoiy soha mutaxassislarini chin koʻngildan samimiy muborakbod etaman. Bayramingiz muborak boʻlsin azizlar.

                                                                                  Ulugʻbek Ashirov,

                                                          Oʻzbekiston “Adolat” SDP Qashqadaryo

    viloyat Kengashi faoli.