Muzrabotda tibbiy koʻrik tashkil etildi

Oʻzbekiston “Adolat” sotsial-demokratik partiyasi tomonidan tashabbus koʻrsatilib hududlarda fuqarolarni tibbiy koʻrikdan oʻtkazish ishlari olib borilmoqda.Xususan, partiya Muzrabot tuman “Ayollar qanoti” Kengashi tomonidan partiyaning “Bir adolatchi-yuz ayolga himoyachi” loyihasi doirasida tumandagi 48-sonli Oilaviy poliklinika shifokor va hamshiralari hamkorlikda mahalladagi “Ayollar daftari”ga kiritilgan xotin-qizlar uchun bepul chuqurlashtirilgan tibbiy koʻrik tashkil etildi.

Tibbiy koʻrik davomida fuqarolarga sogʻlom turmush tarzi, oʻzi va yaqinlarining salomatligiga eʼtiborli boʻlish boʻyicha maslahatlar berildi. Tadbir davomida 70 nafar ayollar va qizlar bepul tibbiy koʻrikdan oʻtkazilib, terapevt, pediatr, kardiolog va boshqa yoʻnalishdagi malakali shifokorlar koʻrigidan oʻtishdi.Shuningdek, tibbiy koʻrik davomida 15 mln. soʻmlik 8 turdagi dori-darmonlar tarqatildi.

-Juda ham xursand kayfiyatda shifokorlar qabuliga kelyapmiz,-deydi fuqaro Saida Mirzayeva.-Sogʻligʻimiz haqida aniq tasavvurga ega boʻlmoqchimiz. Partiya faollari tomonidan tibbiyot xodimlarining hududimizda tibbiy koʻrik tashkillashtirilgani juda yaxshi ish boʻldi. Ehtiyojmand aholi uchun ushbu tibbiy koʻrik juda qulay vaziyat boʻldi. Mazkur tadbirni tashkil qilgan partiya faollariga minnatdorchilik bildiramiz.

Taʼkidlash kerakki, shifokorlar aholini tibbiy koʻrikdan oʻtkazish bilan birga, hozirgi vaqtda keng tarqalgan oʻpka kasalliklari, diabet, onkologik, yurak-qon tomir kasalliklarining oldini olish, profilaktika qilish va davolash usullari, sogʻlom turmush tarzi va faol jismoniy harakatning inson salomatligidagi oʻrni haqida tushunchalar berishdi. Tibbiy koʻrik davomida mahalladagi nogironligi bor fuqarolarni uyma-uy yurish orqali koʻrikdan oʻtkazildi.Tibbiy koʻrik davomida fuqarolar oʻzlari qiziqqan savollarga javoblar, salomatligi toʻgʻrisidagi muammolarga tegishli koʻrsatmalar olishdi.

Muborak Mamadaliyeva,

Xalq deputatlari Muzrabot tuman Kengashi deputati.