Namanganda- navbatdagi  GULLAR FESTIVALI

Namangan shahrida navbatdagi gullar festivaliga hozirlik koʻrish boshlandi. Endilikda xalqaro maqomga ega boʻlgan mazkur goʻzallik va nafosat bayrami oltmish ikkinchi marta oʻtkaziladi. Ona tabiatni asrab-avaylashga yurtimizning sayyohlik salohiyatini keng targʻib etishni maqsad qilgan ushbu tadbir 21-mayda boshlanib toʻrtinchi iyulga qadar davom etadi. Bayramning asosiy markaziga aylanadigan Bobur nomli madaniyat va istirohat bogʻiga har qachongidan ancha koʻp - ikki yarim million kishi tashrif buyurishi kutilmoqda.

-Xalqaro gullar festivali Namanganning oʻziga xos ramzi sifatida shuhrat qozongan, -deydi “Adolat” SDP viloyat kengashi raisi Isroiljon Joʻrayev. Unda nafaqat mamlakatimizning turli mintaqalaridan, balki xorijiy davlatlardan ham tajribali va taniqli gulchilar qatnashadilar. Bayram doirasida ilmiy musohabalar, davra suhbatlari, koʻngil ochar tadbirlar tashkil etiladi. Gul koʻrgazmalari barchaning diqqat markazida boʻladi.

Darvoqe, keyingi yillarda festivalda “Adolat” SDP vakillari ham faol ishtirok etmoqdalar. Bultur safdoshlarimizning katta bir guruhi bayramda qatnashishdi. Ayniqsa, safdoshlarimiz boshqargan avtomobillarning “Gullar paradida” qatnashganligi esda qolarli voqea boʻldi. Bu safar xam shunday boʻlishi kutilmoqda.

Har galgiday, Oʻzbekiston Respublikasi madaniyat va turizm vazirligi hamda viloyat hokimligi festivalning asosiy tashkilotchilari hisoblanadi. Ular tomonidan bayramga tayyorgarlik koʻrish va oʻtkazish yuzasidan alohida tadbirlar rejasi ishlab chiqilgan. Uni amalga oshirishga kirishildi ham.

Festivalga tashrif buyuruvchilar orasida ommaviy axborot vositalari vakillari ham ishtirok etadilar. “Xalq soʻzi” gazetasining Namangan viloyati boʻyicha muxbiri Qudratilla Najmiddinov ana shularning biri. U bu gal bayram tafsilotlarini qirqinchi marta yoritadi. Keksa jurnalistining aytishicha, 2022 yilda festivalga 30 dan ortiq xorijiy davlatlardan mehmonlar tashrif buyurgan boʻlsa, bu yil 40 dan ortiq mamlakatdan mehmonlar tashrifi kutilmoqda. Ular orasida diplomatik korpus vakillari, Namangan bilan birodarlashgan viloyat va shaharlar mutasaddilari, hamkor qoʻshma korxonalarning chet ellik rahbarlari ham qatnashishi rejalashtirilgan.Qolaversa, bayramda ishtirok etadigan gulchilar geografiyasi ham kengaydi: oʻtgan yili Janubiy Koreya, Hindistondan gulchilar koʻrgazmada ishtirok etgan boʻlsa, bu yil Germaniya, Hindiston, Polsha, Janubiy Koreya, Qirgʻiziston va Italiya gulchilari qatnashadi.

Bundan tashqari, festival boʻlib oʻtadigan Namangan shahridagi Zahiriddin Muhammad Bobur nomli istirohat bogʻida 15 million, shahar koʻchalarida 10 million, jami 25 million gul va koʻchatlar ekish rejalashtirilgan. Shuningdek, shahar koʻchalari turfa xil shaklda bezatiladi.

Qayd etish joizki, hozirgi kunda Namangan viloyatidagi 25 ta mehmonxona, 9 ta xostel, 526 ta oilaviy mehmon uylari, 6 ta yotoqxona, 18 ta sanatoriy va 4 ta dam olish maskani 8,5 mingdan ortiq mehmonni qabul qilish imkoniyatiga ega. Festival arafasida esa yana 5 ta mehmonxona ishga tushiriladi.

Shu bilan birga, festival mehmonlariga xizmat koʻrsatish uchun jami 80 kishidan iborat volontyorlar guruhi shakllantirilmoqda. Xorijiy tillarni puxta oʻzlashtirgan yoshlar shaharning moʻjaz xaritalari va bukletlar bilan taʼminlanadi.

Festivalning madaniy dasturi ham boy va qiziqarli boʻlishi kutilmoqda. Xususan, “Zahiriddin Muhammad Bobur” nomli istirohat bogʻi, “Afsonalar vodiysi” tematik parkida oʻrnatiladigan sahnalarda shoir va yozuvchilar, sirk ustalari, oʻzbek estradasi yulduzlari va folklor ansambllari chiqishlari namoyish etiladi.

Festival yakunida tadbirda munosib ishtirok etgan gulchilar va korxona-tashkilotlar bir necha nominatsiyalar boʻyicha taqdirlanadi.

Nurbek Abdullaev,

“Adolat” SDP Namangan viloyat

Kengashi matbuot kotibi.