Namanganda “Yoshlar parlamenti”ga nomzodlar saralandi

Maʼlumki, bugungi kunda mamlakatimizda demokratik, huquqiy va adolatli jamiyat qurish yuzasidan ulkan saʼy-harakatlar olib borilmoqda. Ahamiyatlisi, mazkur jarayonlarda yosh avlod vakillari ham faol qatnashmoqdalar. Ayni paytda ularning ijtimoiy-siyosiy jabhadagi ishtirokini yanada yuqori darajaga koʻtarish choralari koʻrilmoqda.

- Shu kunlarda Oʻzbekiston Respublikasi Oliy Majlis Qonunchilik palatasi huzuridagi “Yoshlar parlamenti” aʼzoligiga saylov boʻyicha davom etayotgan ishlar bu borada muhim ahamiyat kasb etmoqda, — deydi “Adolat” SDP Namangan viloyat Kengashi raisi oʻrinbosari Bahodir Boltaboyev. — Biz faollar bilan 43-Doʻstlik va 48-Toʻraqoʻrgʻon saylov okruglaridan yosh nomzodlarni koʻrsatdik. Kuni kecha ular viloyat kengashida oʻtkazilgan saylovning ikkinchi bosqichida saralab olindi. Mazkur jarayonda kun tartibidagi masala yuzasidan partiyaning viloyat Kengashi raisi, Saylov hayʼati raisi Isroiljon Joʻrayev soʻzga chiqib, ishtirokchilarni yana bir bor Nizom xamda Saylov hayʼat aʼzolari bilan tanishtirib oʻtdi. Har bir nomzod yuzasidan atroflicha oʻrganish olib borildi, bunda ularning dasturlariga eʼtibor qaratilib, oʻz oʻrnida fikr va mulohazalar bildirildi.

Oʻzbekiston “Adolat” SDP Namangan viloyati Kengashi tomonidan Oʻzbekiston Respublikasi Oliy Majlis Qonunchilik palatasi huzuridagi “Yoshlar parlamenti”ga 43-Doʻstlik va 48-Toʻraqoʻrgʻon saylov okruglaridan nomzodlarini koʻrsatgan yoshlarimiz Nizomda belgilangan tartibda hujjatlarini taqdim etishdi va amaldagi qonunchiligimizga oid savol-javoblar hamda partiya hayotidagi faolligiga qarab baholab borildi.

Ishtirokchilarning Nizomda belgilangan tartibda hujjatlari koʻrib chiqilgach, yakuniy natijalarga asoslanib qaror qabul qilindi. Unga muvofiq Oʻzbekiston Respublikasi Oliy Majlis Qonunchilik palatasi huzuridagi “Yoshlar parlamenti”ga saylovning ikkinchi bosqichida ishtirok etadigan bir qator nomzodlar roʻyxati tasdiqlandi. Endi ularni keyingi bosqichda partiya Siyosiy Kengashi Markaziy apparatida tuzilgan tashkiliy qoʻmita koʻrib chiqadi.

- 43-Doʻstlik saylov okrugi bizning hududimizda joylashgan deydi, — “Adolat” SDP Namangan shahar kengashi raisi Mirzarahmat Olimov. — Biz nomzodlarni tanlashda oshkoralik va xolislikka alohida eʼtibor qaratdik. Faollarimiz oliy oʻquv yurtlari, korxona va tashkilotlarda boʻlishdi. Koʻpchilik bilan suhbatlashish asosida eng munosib nomzodlarni aniqladik. Ular orasidan tanlangan yosh safdoshlarimiz viloyat kengashiga tavsiya etildi. Oʻylaymizki, “Yoshlar parlamenti”ga eng munosiblar saylanadi.

Nurbek ABDULLAYEV,
“Adolat” SDP Namangan viloyat
Kengashi matbuot kotibi.