Navroʻz – qadimiy qadriyatlarimiz tantanasi

Yurtimizga har yili yangicha shukuh bilan kirib keluvchi bahor fasli bayram va shodiyonalarga boy. Har bir shodiyona xalqimiz qalbiga iliqlik olib kiradi. Koʻklam nafa­si ufurib, ertangi kunimizga, kelajakka ishonch, ulkan marralar va zafarlar sari shijoatga toʻldirayotgan ushbu qutlugʻ kunlarda, bar­cha­miz Navroʻzi olamni qarshi olmoqdamiz.

Ayni kunlarda ushbu bahor bayrami munosabati bilan yurtimizning har bir hududlarida turli xil bayram tadbirlari oʻtkazilmoqda. Xususan partiyaning Sharof Rashidov tuman Kengashi tomonidan tumandagi 16-sonli umumtaʼlim maktabida “Navroʻz – qadimiy qadriyatlarimiz tantanasi” mavzusida maʼnaviy-maʼrifiy tadbir tashkil etildi.

Tadbirda partiyaning viloyat, tuman Kengashi xodimlari, Xalq deputatlari Sharof Rashidov tuman Kengashi deputatlari, partiya faollari, maktabning oʻqituvchi va oʻquvchilari, OAV vakillari ishtirok etishdi.

— Yurtimizda millatlararo doʻstlik-totuvlik muhitini mustahkamlash boʻyicha amalga oshirilayotgan tizimli ishlarning amaliy natijasi oʻlaroq, Oʻzbekiston fuqarosi boʻlgan turli millat va elat vakillari ham boshqa shodiyonalarimiz kabi Navroʻzni ham keng nishonlaydi, — deydi Xalq deputatlari tuman Kengashi deputati Shoira Akbarova. Xalqimizning mehnatkashligi, mehmondoʻstligi, bagʻrikengligi, insonparvarligi ana shunday qutlugʻ ayyomlarda yorqin namoyon boʻladi.

Tadbirda maktab oʻquvchilari tomonidan tayyorlangan kuy-qoʻshiq, raqs va sahna koʻrinishlari tadbir ishtirokchilariga koʻtarinki kayfiyat bagʻishladi.

Tadbir soʻngida faollar partiyaning tashakkurnoma va esdalik sovgʻalari bilan taqdirlanishdi.

“Adolat” SDP Jizzax viloyat Kengashi

Matbuot xizmati.