Navroz bayrami quvonchlari

Oʻlkamizda yana bahor nafasi kezmoqda. Butun Oʻzbekistonda boʻlgani kabi Namangan viloyatining shahar va qishloqlarida ham koʻrkam ayyom tantanalari davom etmoqda. Korxonalar, tashkilotlar, muassasalar, mahallalar, aholi xonadonlarida doshqozonlarda sumalak pishirilmoqda. Dasturxonlardagi bahoriy neʼmatlar ham bahri dilni ochadi.

- Tabiat uygʻonishi, dov-daraxtlarning yashil rangga burkalishini xalqimiz azaldan intizorlik bilan kutgan, — deydi “Adolat” SDP Namangan viloyat Kengashi raisining oʻrinbosari Yorqinoy Hojimatova. –Ayniqsa, oʻtgan qahraton qishda bahorni nihoyatda sogʻindik. Shuning-uchun Navroʻz tantanalari joylarda alohida koʻtarinkilik bilan oʻtmoqda. Tadbirlarda safdoshlarimiz ham faol qatnashmoqdalar.

Partiyamizning Namangan shahar kengashi raisi Mirzarahmat Olimov viloyat markazida tashkil etilayotgan tantanalar haqida soʻzlab berdi. Masalan, “Ishga marhamat” monomarkazida oʻtkazilgan tadbirda qadimiy bayramning tarixiy qadriyatlari, ulugʻvor milliy anʼanalar oʻz aksini topdi.

Jamoa toʻplangan dasturxonni sumalak, koʻklam taomlari bezadi. Monomarkazda taʼlim olayotgan yoshlar kasbiy koʻnikmalarini namoyish etdilar.

Navroʻz ayyomi doirasida “Yashil makon” aksiyasi ham qizgʻin davom etmoqda. Bu ish ayniqsa, Davlatobod tumanida namunali yoʻlga qoʻyilgan. Bu erda bahorgi mavsumda 201 ming tup mevali va manzarali daraxt koʻchatlari oʻtqazish moʻljallangan. Hozirgacha rejaning yarmidan ortigʻi bajarildi.

Eʼtiborga loyiq yana bir jihat shundaki, Navroʻz ayyomining goʻzalligi va tarovatini yosh hamda navqiron qalb egalari ham teran his etmoqdalar. Xususan, kuni kecha “Adolat” SDP Kosonsoy tuman kengashi faollari 16-davlat maktabgacha taʼlim tashkilotida oʻtkazilgan tadbirda ishtirok etdilar. “Assalom, Navroʻz!” deb nomlangan bayram barchaga xush kayfiyat bagʻishladi. Kichkintoylar ijrosidagi jozibali raqslar, sheʼr va qoʻshiqlar olqishlar bilan kutib olindi.

Viloyatdagi Navroʻz ayyomi tantanalari keng miqyosda davom etmoqda.

Nurbek Abdullaev,

“Adolat” SDP Namangan viloyat Kengashi matbuot kotibi.