Oʻqituvchining shaʼni, qadr-qimmati kafolatlanadi

Yangilanayotgan Konstitutsiyadagi 52-modda meni diqqat eʼtiborimni oʻziga tortdi. Mazkur moddaga koʻra davlat oʻqituvchilarning shaʼni va qimmatini himoya qiladi, ularning ijtimoiy va moddiy farovonligi, kasbiy jihatdan oʻsishi toʻgʻrisida gʻamxoʻrlik qiladi. Sifatli taʼlim-albatta bu maqsadga erishish avvalo oʻqituvchilarga bilimi keng, zamonaviy taʼlim standartlarini puxta oʻzlashtirgan soha vakillariga bogʻliq. Aniqroq aytganda oʻqituvchi va murabbiylarni tayyorlash, ularning eng munosiblarini saralab taʼlim muassasalariga jalb etish taʼlim sifatini taʼminlashga intilayotgan jamiyat uchun hayot-mamot masalasidir. Shu bois yurtimizda bilimi keng va tajribali oʻqituvchilarni qoʻllab-quvvatlash va ular safini kengaytirishga davlat darajasida eʼtibor qaratilmoqda. Yana bir quvonchli voqea-oʻz kelajagini farzandi kamoli bilan bogʻlashga odatlangan xalqimizning xohish irodasi takliflari inobatga olingan yangilanayotgan Konstitutsiyada ham oʻqituvchilarning obroʻsi, qadr-qimmatini oshirish va himoya qilishga qaratilgan alohida modda kiritilmoqda. 52-moddaga asosan davlat oʻqituvchilarning shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan oʻsishi toʻgʻrisida gʻamxoʻrlik qiladi, deb qatʼiy belgilab qoʻyilmoqda. Bunda oʻqituvchilar qatorida biz ham juda xursandmiz. Chunki, bu bilan nafaqat oʻqituvchining obroʻsi yuksaklarga koʻtariladi, balki, bevosita kasb, umuman jamiyatdagi insonning oʻrni Oʻzbekistonda inson manfaatlari uchun xizmat qilayotgan jamiyat boʻlib shakllanishida juda ham yuksak oʻrni boʻladi va kelajakda oʻzini samarasini beradi.

Aytish joizki, soʻnggi besh yilda taʼlim dargohlarida ortiqcha qogʻozbozlikka chek qoʻyildi. Eng asosiysi, oʻqituvchilarning oylik maoshlari oshirib borilyapti. Umumtaʼlim fanlari boʻyicha tegishli darajada sertifikatga ega boʻlgan pedagog kadrlarga har oy qoʻshimcha 20 foizdan 50 foizgacha ustama toʻlanmoqda. Olis hududlarga borib ishlayotgan yuqori malakali pedagoglar uchun ustamalar belgilash joriy etildi.

Bundan besh-olti yil avval tarixga nazar tashlaydigan boʻlsak, oʻqituvchilar uchun hech qanday imtiyoz yoʻq edi. Ish jarayonida 18 ta hujjat rasmiylashtirilib, shundan besh-oltitasi bilan darsga kirishga ruxsat bor edi. Avval oʻqituvchi besh-olti soat hujjatlarni toʻldirishga vaqti ketgan boʻlsa, bugun esa shu vaqtda oʻquvchi bilan shugʻullanyapti.

Sifatli taʼlim taraqqiyot uchun eng katta investitsiya deya eʼtirof etilayotgan ekan, bu islohotlarning asosiy ishtirokchisi boʻlgan oʻqituvchilar obroʻsi, qolaversa maoshini mashaqqatli va sharafli mehnatiga munosib ravishda oshirib borish ularning qadr-qimmatini himoya qilish juda muhim. Zamonaviy taʼlimni faqatgina zamonaviy maqomi baland, bilimi keng oʻqituvchilar bera oladi.

Rustam Hamrayev,

Oʻzbekiston “Adolat” SDP Surxondaryo viloyat Kengashi raisi.